Ресей Қазақстанға кірудің жаңа тәртібіне қатысты түсініктеме сұрады: Сыртқы істер министрлігі жауап берді

Қазақстан Сыртқы істер министрлігі QazETA электронды кіру рұқсаты туралы ақпарат жаңа талап қолданылатын барлық мемлекетке, соның ішінде Ресейге де дипломатиялық арналар арқылы жіберілгенін мәлімдеді. Бұл – Ресей СІМ өкілі Мария Захарованың Мәскеу Қазақстаннан жаңа көші-қон тәртібіне қатысты қосымша түсініктеме күтетінін айтқан мәлімдемесіне берілген жауап.

Қазақстан СІМ мәліметінше, QazETA Қазақстанға визасыз келе алатын 85 елдің азаматына, соның ішінде Ресей азаматтарына да қолданылады.

«Қазіргі уақытта QazETA жүйесі туралы толық ақпарат аталған мемлекеттердің барлығына дипломатиялық арналар арқылы берілді», – деп хабарлады министрлік.

СІМ электронды рұқсатты рәсімдеу тәртібі Қазақстанның шетелдегі мекемелерінің сайттары мен басқа да ақпараттық ресурстарында жарияланатынын айтты. Сонымен бірге жақын арада Астанада шетелдік дипломатиялық өкілдіктер үшін арнайы брифинг өткізіліп, QazETA жүйесінің жұмыс тәртібі түсіндіріледі.

Ресей не деді?

21 қазанда Ресей СІМ-нің ресми өкілі Мария Захарова Мәскеу Қазақстанның электронды кіру рұқсатына қатысты қосымша түсініктемесін күтетінін мәлімдеді.

Ол жаңа талаптарды қолданыстағы халықаралық келісімдерді, соның ішінде Еуразиялық экономикалық одақ аясындағы уағдаластықтарды ескере отырып түсіндіру қажет екенін айтқан.

QazETA қашан міндетті болады?

Қазақстан үкіметі бұған дейін визасыз режим қолданылатын елдердің азаматтарына электронды кіру рұқсатын алу тәртібін бекіткен.

QazETA 2026 жылғы 1 қарашадан бастап сынақ тәртібінде іске қосылады. Ал 2027 жылғы 1 шілдеден бастап визасыз елдердің азаматтары үшін міндетті болады. Бұл талап Ресей мен ЕАЭО-ның басқа елдерінің азаматтарына да қатысты.

Электронды рұқсатты Қазақстанға келерден кемінде 72 сағат бұрын рәсімдеу қажет. QazETA мемлекеттік шекарадан өтуге алдын ала рұқсат ретінде пайдаланылады.

Жаңа талаптан 16 жасқа толмаған балалар мен 65 жастан асқан адамдар, визасы, уақытша тұруға немесе тұрақты тұруға рұқсаты бар шетелдіктер босатылады. Сондай-ақ әуежайдың транзит аймағынан шықпайтын жолаушыларға, дипломаттар мен ресми делегация мүшелеріне, халықаралық тасымалдаушылар мен экипаждарға QazETA қажет болмайды.