ШҚО-да 50 жылдан астам пайдаланылған ескі мектептің орнына жаңасы салынды

Республика күні қарсаңында Шығыс Қазақстан облысы Күршім ауданының Қыстау-Күршім ауылында 50 оқушыға арналған жаңа мектеп ашылды. Ол жарты ғасырдан астам уақыт пайдаланылып, апатты жағдайға жеткен ескі мектептің орнына салынды.

Бұрынғы мектеп 1974 жылы салынып, 1975 жылы пайдалануға берілген. Ғимарат әбден тозған, жеке спорт залы болмаған. Жаңа мектепте оқу кабинеттері мен зертханалар, спорт және мәжіліс залдары, асхана мен кітапхана қарастырылған. Балалар бір ауысымда білім алады.

Мектеп жанынан мектепке дейінгі шағын орталық та ашылды. Бұған дейін Қыстау-Күршімде балабақша болмаған. Қазір шағын орталыққа алты бала барып жүр.

Мектепте 26 адам еңбек етеді, оның 13-і – мұғалім. Мамандарды ауылға тарту үшін жергілікті кәсіпорынның қолдауымен екі пәтер сатып алынған. Соның арқасында балалары бар екі отбасы ауылға көшіп келді. Олардың арасында физика және тарих пәндерінің мұғалімдері бар.

Мектептің ашылуында Шығыс Қазақстан облысының әкімі Нұрымбет Сақтағанов білім сапасы баланың тұрғылықты жеріне байланысты болмауға тиіс екенін атап өтті. Сондай-ақ мектепке робот техникасы кабинетін жабдықтауға сертификат табыстады.