ҰҚК Қазақстанда интернет-алаяқтық жүйесін құрған Қытайдың 13 азаматын ұстады

Қазақстанда заң талаптарын бұзып жүрген Қытайдың 13 азаматы ұсталды. Ұлттық қауіпсіздік комитетінің мәліметінше, тексеру кезінде олардың ел аумағында жасырын халықаралық интернет-алаяқтық жүйесін ұйымдастырғаны анықталған.

ҰҚК заңсыз көші-қонға қарсы іс-шара барысында ұсталғандардан көп мөлшерде компьютерлік техника, ұялы телефондар және Starlink жерсеріктік интернет байланысының жиынтықтары табылғанын хабарлады. Сондай-ақ олардың криптоәмияндарында ірі көлемде қаражат болған.

Комитеттің мәліметінше, топтың әрекеті Қазақстан азаматтарына емес, басқа елдердің азаматтарына бағытталған. Олардың жұмысы шетелден үйлестірілген.

Осыған байланысты тексеру Қытайдың Қоғамдық қауіпсіздік министрлігімен бірлесіп жүргізілген. Нәтижесінде ұсталғандардың кейбірі Қытайда осыған ұқсас әрекеттері үшін іздеуде жүргені анықталған.

16 қазанда Қытай азаматтары Қазақстаннан шығарылып, істі әрі қарай қарау үшін Қытайдың уәкілетті органдарына берілді.

ҰҚК әзірге интернет-алаяқтықтың нақты қалай жүргізілгенін, қанша адамның зардап шеккенін және криптоәмияндардан қанша қаражат табылғанын жариялаған жоқ.