Қазақстанда колледж оқушыларына «клининг» дипломы берілуі мүмкін

Қазақстан колледждерінде клининг саласы бойынша мамандарды ресми түрде даярлау жүйесі енгізілуі мүмкін. Бұл туралы депутаттық сауалға берген жауабында Оқу-ағарту министрі Жұлдыз Сүлейменова мәлімдеді.

Ведомство басшысының айтуынша, елімізде қызмет көрсету саласының қарқынды дамуына байланысты тазалық саласындағы білікті мамандарға деген сұраныс жоғары. Дегенмен, қысқа, орта және ұзақ мерзімді кезеңдерге арналған кадрларға деген нақты қажеттілікті Еңбек және халықты әлеуметтік қорғау министрлігі қалыптастырады.

«Клининг саласы бойынша кадрларға сұраныс қалыптасқан жағдайда, тиісті мамандарды даярлау мәселесі қосымша пысықталатын болады», - деп атап өтті Жұлдыз Сүлейменова.

Министр жаңа мамандықты білім беру жүйесіне енгізу тек еңбек нарығындағы жалпы сұраныспен шектелмей, жұмыс берушілердің нақты қажеттілігіне, талап етілетін біліктілік деңгейіне және өңірлік бөлінісіне негізделуі тиіс екенін жеткізді. Мүдделі мемлекеттік органдардан, салалық қауымдастықтардан немесе жұмыс берушілерден ұсыныс түскен жағдайда, бұл бастама белгіленген тәртіппен қарастырылады.

Бұған дейін Парламент депутаты Нұрайнаш Камалова Қазақстанда клининг саласындағы жұмыспен қамтуды заңдастыруды және қызметкерлер үшін кәсіби оқыту мен әлеуметтік кепілдіктер жүйесін құруды ұсынған болатын. Депутаттың пікірінше, ресми табыстың төмендігі салдарынан бұл саладағы жұмыскерлер бейресми еңбек қатынастарына тартылып, зейнетақы, әлеуметтік қорғау және еңбек құқықтарын жоғалту тәуекелдеріне тап болуда.