Астана, Алматы және Шымкенттен көшкендерге мемлекет ақша төлейді

2027 жылдан бастап Астана, Алматы, Шымкент және халық саны тұрақты өсіп жатқан бірқатар облыстан жұмыс күші тапшы өңірлерге ерікті түрде қоныс аударған қазақстандықтарға мемлекеттік қолдау көрсетіледі. Еңбек және халықты әлеуметтік қорғау министрі тиісті төлемдерді беру тәртібін бекітті. Бұйрыққа Азаттық назар аударған.

Қоныс аударушыларды қабылдайтын өңірлер қатарына Шығыс Қазақстан, Солтүстік Қазақстан, Қостанай, Павлодар, Абай, Қарағанды және Ұлытау облыстары енгізілген.

Ал азаматтарды көшіру көзделген өңірлер – Астана, Алматы, Шымкент қалалары, Жамбыл, Түркістан және Маңғыстау облыстары. Бұл өңірлерде халық санының тұрақты өсуі ескерілген.

Бағдарламаға қатысушыларға бірнеше бағыт бойынша көмек көрсетіледі. Атап айтқанда, мемлекет:

• көшуге жұмсалған шығынды өтейді;
• коммуналдық төлемдерге көмек береді;
• қызметтік баспана ұсынады немесе үй жалдау шығынының бір бөлігін өтейді;
• кәсіптік оқуға мүмкіндік береді;
• кәсіп бастауға көмектеседі;
• тұрғын үй сертификатын алуға мүмкіндік береді.

Бағдарлама қатысушысын жұмысқа қабылдаған жұмыс берушілер де мемлекеттік субсидия ала алады.

Алайда бұл көмек кез келген қоныс аударушыға берілмейді. Мысалы, өзінің туған өңіріне қайтып, сол жерде баспанасы бар азамат бағдарламаға қатыса алмайды. Сондай-ақ жаңа тұрғылықты жеріне тіркелмегендерге қолдау көрсетілмейді.

Кей жағдайда мемлекет берілген ақшаны кері қайтаруды талап ете алады. Егер бағдарламаға қатысушы жаңа өңірде тұрмаса, баспананы туысынан сатып алса, бағдарламаға енгізілмеген елді мекеннен үй алса немесе жалған мәлімет берсе, алған қаражатын қайтаруға міндеттеледі.

Жаңа тәртіп 2027 жылдан бастап күшіне енеді және ерікті қоныс аударуды реттейтін бұған дейінгі бірқатар құжаттың орнына қолданылады.

Қазақстанда жұмыс күші көп өңірлерден маман тапшы аймақтарға ерікті қоныс аудару бағдарламалары бұған дейін де болған. Жаңа құжат осы тетіктер бойынша мемлекеттік қолдау көрсету тәртібін жаңартады.