Отбасы банк комиссияны көтереді: Кімдерге әсер етеді?

31 қазаннан бастап Отбасы банктен 50 млн теңгеден астам несие алатын клиенттер үшін қарыз беру кезінде алынатын комиссияның ең жоғары мөлшері өседі. Ал 50 млн теңгеге дейін несие алатындардың төлемі өзгермейді, деп хабарлады банк.

Комиссия мөлшерлемесі бұрынғыдай несие сомасының 1 пайызы болып қалады. Өзгеріс тек оның ең жоғары шегіне қатысты. Бұған дейін несие көлеміне қарамастан комиссия 300 мың теңгеден аспайтын.

31 қазаннан бастап комиссия мынадай тәртіппен есептеледі:

• 50 млн теңгеге дейін – 1%, бірақ 300 мың теңгеден аспайды;
• 50 млн теңгеден 100 млн теңгеге дейін – 1%, бірақ 500 мың теңгеден аспайды;
• 100 млн теңгеден жоғары – 1%, бірақ 1 млн теңгеден аспайды.

Отбасы банктің мәліметінше, өзгеріс қарыз алушылардың басым бөлігіне әсер етпейді. Клиенттердің 92 пайызы 50 млн теңгеге дейін несие алады. Сондықтан олар үшін комиссияның ең жоғары мөлшері бұрынғыдай 300 мың теңге болып қалады.

Мысалы, 20 млн теңге несие алған адам 200 мың теңге комиссия төлейді. Бұл – несие сомасының 1 пайызы және бұрынғы тәртіппен салыстырғанда өзгермейді.

Ал 70 млн теңге несие рәсімдегенде 1 пайыздық комиссия 700 мың теңге болар еді. Бұрын клиент ең көбі 300 мың теңге төлесе, жаңа тәртіп бойынша 500 мың теңге төлейді.

Жаңа талап банк 31 қазаннан бастап қабылдаған өтінімдерге қолданылады. Оған дейін берілген өтінімдер бұрынғы тәртіппен қаралады. Бұрын рәсімделіп қойған несиелерге де өзгеріс жүрмейді.

Комиссия несие берілген кезде бір рет төленеді. Мемлекеттік бағдарламалар аясында берілетін қарыздардан мұндай комиссия алынбайды.