Жасанды интеллект әлемін өзгерткен NVIDIA басшысы Қазақстанға келеді

23 қазанда Астана қаласында технологиялық сектордың маңызды оқиғасы өтеді. Елордаға әлемдегі жетекші технологиялық компаниялардың бірі – NVIDIA негізін қалаушы әрі бас атқарушы директоры Дженсен Хуанг сапармен келеді.

Ғаламдық деңгейдегі сарапшылардың пікірінше, заманауи экономикада жасанды интеллект негізгі өндіргіш күшке айналуда, ал есептеу қуаттары (compute power) мемлекеттердің стратегиялық бәсекеге қабілеттілігін айқындайды. Бул тұрғыда Қазақстан өңірлік цифрлық хаб ретінде өзінің инфрақұрылымдық мүмкіндіктерін жүйелі түрде кеңейтіп келеді.

Дженсен Хуангтың пайымдауынша, жасанды интеллект бағытын дамыту электр энергиясын, микросхемаларды, дата-центрлерді және қолданбалы бағдарламаларды қамтитын кешенді ресурстар тізбегін талап етеді. Осы орайда «AI Factory» (жасанды интеллект фабрикасы) тұжырымдамасы деректерді сақтау орны ғана емес, ауқымды есептеулерді жүзеге асыратын инфрақұрылым ретінде басты орынға шығады.

Аталған логика Қазақстанның цифрлық стратегиясына толық сәйкес келеді. Қазіргі уақытта елімізде Alem.cloud ұлттық суперкомпьютері жұмыс істейді және Екібастұз қаласында қуаты 1 ГВт-қа дейін ұлғайтуды көздейтін Data Center Valley кластерлік жобасы дамып келеді.

Сапар барысында қарастырылатын негізгі бағыттардың бірі – өнеркәсіптік кәсіпорындарға «цифрлық егіздер» (digital twins) мен Physical AI (физикалық ЖИ) технологияларын енгізу. Бұл модель өндіріс процестерін реалды уақыт режиміне көшірмес бұрын виртуальды ортада модельдеуге, жүйелік қателіктерді алдын ала жоюға және шығындарды оңтайландыруға мүмкіндік береді. Бұл шешімдер Қазақстанның тау-кен, металлургия, энергетика және логистика салалары үшін жоғары прикладтық мәнге ие.

AI & Digital Bridge 2026 форумында Премьер-Министрдің орынбасары – Жасанды интеллект және цифрлық даму министрі Жаслан Мадиев ЖИ-экосистемасын инфрақұрылымнан бастап кадрлар даярлауға дейінгі 5 деңгей бойынша дамыту концепциясын ұсынған болатын.

Осы бағыттағы халықаралық ынтымақтастық шеңберінде Firebird және NVIDIA компанияларымен ИИ-инфрақұрылымы саласында жалпы сомасы 10 миллиард АҚШ долларына жуық келісімдер пакеті жарияланды.

Астанада өтетін Fireside Chat жиынында Дженсен Хуанг, Жаслан Мадиев және отандық Higgsfield AI стартапының өкілдері жасанды интеллект экономикасын дамыту, отандық өнімдерді ғаламдық нарыққа шығару және өндірістік тиімділікті арттыру мәселелерін талқылайды.