Адамды автобусқа итеріп кіргізген видео тарады: Алматы әкімдігі түсініктеме берді

Алматыда лық толы №38 автобусқа жолаушыны итеріп кіргізген видео әлеуметтік желіде тарады. Қала тұрғыны қоғамдық көліктің шамадан тыс толуына шағымданғаннан кейін Алматы қаласының Жол қозғалысын ұйымдастыру және жолаушылар көлігі басқармасы түсініктеме берді.

Басқарманың мәліметінше, бұған дейін №38 бағыттың жұмысын жақсарту үшін қозғалыс кестесі қайта қаралып, рейстер саны көбейтілген және автобустардың аялдап тұру уақыты қысқартылған.

Алайда әкімдік бұл шаралар мәселені толық шешпегенін айтады. Әсіресе қарбалас уақытта жолдағы кептеліс салдарынан автобустар кестеден кешігеді. Соның кесірінен көліктердің жүру аралығы ұзарып, аялдамаларда жолаушылар көбейеді.

«Жолдағы қазіргі жүктеме сақталған жағдайда рейстер санын көбейту және қозғалыс кестесін өзгерту мәселені толық шешуге мүмкіндік бермейді. Бағытта автобус саны жеткілікті болғанның өзінде жол кептелісі айналым уақытын, қозғалыстың тұрақтылығын және белгіленген аралықтың сақталуын айтарлықтай қиындатады», – деп түсіндірді басқарма.

Threads желісіндегі жазба авторы жариялаған видеода жолаушыларға толы автобусқа бір әйелді сыртта тұрған адамның итеріп кіргізіп жатқаны көрінеді.