Қазақстан АҚШ-қа тікелей рейсті қашан ашатыны белгілі болды

Қазақстан мен АҚШ арасындағы алғашқы тікелей әуе рейсі 2027 жылы ашылуы мүмкін. Астана мен Нью-Йоркті тікелей байланыстыру жоспарланып отыр, деп мәлімдеді көлік вице-министрі Талғат Ластаев ИКАО қауіпсіздік апталығы аясында.

Оның айтуынша, бірнеше апта бұрын Қазақстанға АҚШ-тың Федералдық авиация басқармасының аудиторлары келген. Қорытынды кездесуде мамандар Қазақстанның азаматтық авиация жүйесінің жай-күйі мен халықаралық талаптарға сәйкестігіне жоғары баға берген. Аудиттің ресми қорытындысы қарашада жарияланады деп күтіліп отыр.

«Жыл соңына дейін Қазақстан АҚШ аумағына рейс орындау құқығын ресми түрде алады деп ойлаймыз. Қалай болғанда да, алдымызға осындай міндет қойып отырмыз», – деді Ластаев.

АҚШ-қа тікелей ұшуға арналған Dreamliner ұшағы желтоқсанда жеткізіледі деп жоспарланған. Алайда жаңа әуе кемесі бірден алыс бағытқа шығарылмайды. Вице-министрдің сөзінше, алдымен ұшқыштар мен техникалық мамандар Dreamliner-де белгілі бір ұшу сағатын жинауы керек.

«Осы талаптар орындалған жағдайда келесі жылдың ішінде тікелей рейс ашылады деп күтеміз», – деді ол.

Жоспар бойынша тікелей әуе қатынасы Астана мен Нью-Йорк арасында ашылады. Ластаев бұл бағытқа сұраныс бар екенін айтып, Қазақстан мен АҚШ арасындағы инвестициялық және экономикалық байланыстың дамуын ескерсек, рейс өзін ақтайды деген болжам жасады.