2027 жылы Рамазан қашан басталады: ҚМДБ діни күндер кестесін жариялады

Қазақстан мұсылмандары діни басқармасы 2027 жылғы діни күндер мен мерекелердің кестесін жариялады. Кестеге сәйкес, қасиетті Рамазан айы 8 ақпанда басталады.

Қадір түні 5 наурыздан 6 наурызға қараған түнге түседі. Ал Ораза айт 9 наурызда басталады.

Құрбан айттың бірінші күні 16 мамырға белгіленген. Мереке үш күнге – 16, 17 және 18 мамырға жалғасады. Құрбан айттың алдындағы Арапа күні – 15 мамыр.

Сонымен қатар ҚМДБ кестесінде Бараат түні 22 қаңтардан 23 қаңтарға қараған түнге, Ашура күні 15 маусымға, Мәуліт 14-15 тамызға белгіленген.

ҚМДБ түсіндіргендей, хижри айлардың басталуы халықаралық астрономиялық зерттеу орталықтарының деректері негізінде есептелген. Дегенмен жаңа айдың көрінуіне байланысты діни мерекелердің нақты күні бір күн кейін немесе ілгері жылжуы мүмкін.