Еуропаның төрт ірі компаниясы Starlink-ке балама жасау үшін күш біріктірді

Ғарыштағы және телекоммуникация нарығындағы үстемдік үшін күрес жаңа деңгейге көтерілді. Еуропаның ең ірі төрт телекоммуникациялық гиганты - Deutsche Telekom, Orange, Telefónica және Vodafone - күш біріктіріп, Илон Масктың Starlink империясына төтеп беретін амбициялық жобаны бастады.

Бұл бастаманың басты ерекшелігі - қатардағы смартфондарды ешқандай қосымша антеннасыз немесе арнайы жабдықсыз тікелей спутникке қосу (Direct-to-Device) мүмкіндігі. Financial Times басылымының хабарлауынша, жоба Еуропа Одағының цифрлық суверенитетін қамтамасыз етіп, аймақтың шетелдік технологияларға тәуелділігін едәуір азайтуды көздейді.

Еуропалық төрттік Mobile Satellite Services (MSS) спутниктік байланыс жиіліктеріне бірлесіп өтінім беру үшін арнайы келісімге қол қойды. Жоба аясында:

• Ғарыштық инфрақұрылымды қаржыландыру үшін арнайы спутниктік серіктес таңдалады;

• Қосылу мүмкіндігі шектеулі немесе алыс шалғай аймақтар үздіксіз интернетпен және байланыспен қамтамасыз етіледі;

• Ұялы телефон қолданушылары әлемнің кез келген нүктесінде тікелей ғарыштық желіге қосыла алады.

Телеком-операторлар бұл қадамның нарықтағы монополияны жойып, тұтынушылар үшін әділ әрі ашық бәсекелестік тудыратынына сенімді. Илон Масктың ғарыштық желісіне балама болатын бұл жоба Еуропаның қауіпсіздік пен цифрлық инфрақұрылымды өз бақылауында ұстауына жол ашпақ.