Жапаров: Әблязов Бішкектен Қазақстандағы саяси әрекетін ұйымдастырғысы келді

Қырғызстан президенті Садыр Жапаров қазақстандық Мұхтар Әблязовтың 2020 жылы онымен 40 минут телефон арқылы сөйлесіп, ақша сұрағаны туралы мәлімдемесін жоққа шығарды. Жапаров Әблязовпен телефон арқылы сөйлескенін растағанымен, әңгіме шамамен екі минутқа ғана созылғанын айтты. Бұл туралы ол SUPER.KG порталына берген сұхбатында мәлімдеді.

Жапаровтың айтуынша, ол 2020 жылғы қазан оқиғаларына дейін Әблязовпен жеке таныс болмаған. Сол кезде жанында болған Мелис Аспеков оған телефонын беріп, Әблязовтың сөйлескісі келетінін айтқан.

Қырғызстан президентінің нұсқасы бойынша, Әблязов алдымен Қырғызстандағы саяси оқиғалар туралы айтып, кейін Бішкекке келіп, Қазақстандағы билікке қарсы саяси әрекетін сол жерден ұйымдастыруға мүмкіндік сұраған.

«Біріншіден, мен көрші елдердің саясатына араласпаймын. Екіншіден, сіз үшін Қазақстанмен қарым-қатынасымды бұзбаймын. Бішкекке келмей-ақ қойыңыз, өз ісіңізбен айналысыңыз», – деп Жапаров сол кездегі жауабын жеткізді.

Оның сөзінше, телефон әңгімесі шамамен екі минутқа созылған. Осылайша Жапаров Әблязовтың 40 минут сөйлескені туралы сөзін де жоққа шығарды.

Жапаров Әблязовтан ақша сұрағаны туралы мәлімдемені де «өтірік» деп атады. Қырғызстан президенті сол кезеңде билік басына келгенін және одан қаржы сұрауға қажеттілігі болмағанын айтты.

«Өзі қайыршылық жасап, Франциядағы жеке өміріне қазақ халқынан теңге сұрап жүрген адамнан мен ақша сұрады дегенге кім сенеді? Қайыршыдан ақша сұрады деудің өзі қисынға келмейді», – деді Жапаров.

Әблязов бұған дейін Жапаровты бұрыннан танитынын, 2020 жылы онымен телефон арқылы шамамен 40 минут сөйлескенін және сол әңгімеде Жапаров одан ақша сұрағанын мәлімдеген. Жапаровтың бүгінгі жауабы осы мәлімдемеге қатысты айтылды.