Дипфейк арқылы алматылық әйелдің атына төрт банк шоты ашылып, 36 млн теңге аударылған

Алаяқтар Алматы тұрғыны Зухра Валиеваның жеке деректері мен қолдан жасалған бейнесін пайдаланып, оның атына төрт банк шотын ашқан. Алты күн ішінде бұл шоттар арқылы 35 млн 931 мың теңге өткен. Әйел шоттарды өзі ашпағанын және ондағы ақшаға иелік етпегенін айтады. Соған қарамастан сот одан 3,2 млн теңге өндіру туралы шешім шығарған. Бұл жөнінде "Еуразия" Бірінші арнасы хабарлады.

Валиева бұл туралы жазда білген. Оған бейтаныс адамдар хабарласып, бұрын аударған ақшаларын қайтаруды талап ете бастаған. Осыдан кейін әйел банкке барып, өзінің атына ашылған шоттарды бұғаттауды сұраған. Банктің қауіпсіздік қызметі оған шот ашу кезінде биометриялық тексеруден өтуге пайдаланылған бейнені көрсеткен. Әйелдің сөзінше, бейнедегі адам өзіне ұқсамаған.

Қаржы нарығын реттеу және дамыту агенттігінің тексеруі кезінде 11–17 маусым аралығында оның атына ашылған шоттар арқылы 35 млн 931 мың теңге өткені анықталған. Реттеуші клиенттің жеке басын растау Валиеваның нақты қатысуынсыз және келісімінсіз жүргізілгенін, ал банк клиентті тиісті деңгейде тексермегенін анықтаған. Банктегі ішкі тексеруден кейін бірнеше қызметкер тәртіптік жауапкершілікке тартылып, материалдар Алматы полициясына жіберілген.

Алайда полиция әйелдің өтінішін қараусыз қалдырған. Полиция мұны Валиеваның өзіне тікелей материалдық залал келмегенімен түсіндірген. Оған банк арқылы шоттарды жоюға, мәселе шешілмесе, сотқа жүгінуге кеңес берілген.

Кейін Ақтөбедегі компаниялардың бірі Валиеваға қарсы сотқа жүгінген. Компания алаяқтар ашқан шоттардың біріне аударылған 3,2 млн теңгені қайтаруды талап еткен. Алатау қаласының соты талапты қанағаттандырып, түскен ақшаны негізсіз баю деп таныған.

Валиева бұл шешіммен келіспейді. Ол және заң кеңесшісі қазір апелляциялық шағым дайындап жатыр. Сондай-ақ олар әйелдің атына банк шоттарының заңсыз ашылуына байланысты істі бөлек қарауға қол жеткізбек. Тағы бір талапкер құжаттармен танысқаннан кейін әйелге қойған талабын қайтарып алған.