Компьютер алдында шаршағандарға ем: Көңіл-күйді 30 секундта көтеретін әдеттер

Қазіргі таңда стресс пен шаршаудан арылу үшін сағаттап спортпен айналысу немесе таңғы сағат 5-те медитация жасау шарт емес. Делфт технологиялық университетінің (Нидерланд) зерттеушісі Натали Ван дер Вал мен «Micropractice» кітабының авторы Эли Сусманның айтуынша, психологиялық жағдайды жақсарту үшін 30 секундтық «микропрактикалар» жеткілікті, деп хабарлайды BBC.

Ғалымдар ұсынған ең тиімді әрі жылдам 4 әдіс:

1. «Жалған» күлкі табиғи қуанышқа айналады (Laughter yoga)

Адам себепсіз күле бастағанда, ми оны шынайы қуаныш ретінде қабылдайды. Зерттеулер көрсеткендей, бұл әдіс депрессия мен мазасыздықты азайтуда кәдімгі әзілге күлгеннен екі есе тиімдірек.

• Қалай жасау керек: Ішіңізге қолыңызды қойып, 3 рет терең дем алыңыз да, күле бастаңыз. Көп ұзамай бұл шынайы күлкіге ұласады.

2. Экраны бар жұмыс орнындағы «микро-йога»

Мойын мен арқадағы кернеуді басуға арналған 15-30 секундтық созылу жаттығулары жұмыс өнімділігін 15%-ға арттырады. Ағзаны созу жаттығулары терең тыныс алумен ұштасқанда эмоционалдық шаршауды азайтады.

• Қалай жасау керек: Қолды арқаның артына ұстасып, дем алғанда кеудені жоғары көтеріңіз. Баяу 2-3 рет дем алып, денеңізді босатыңыз.

3. Баяу тыныс алу – ми толқындарын өзгертеді

Не бәрі 3 рет баяу әрі терең дем алу мидағы тыныштыққа жауап беретін альфа және тета толқындарын белсендіреді. Неаполь университетінің зерттеушісі Амит Кумардың айтуынша, бұл әдіс кортизол (стресс гормоны) деңгейін төмендетеді.

• Қалай жасау керек: Көзіңізді жұмып, ішке ауа жұтудан қарағанда сыртқа шығару уақытын ұзағырақ етіп, 10 секундтан 3 рет баяу дем алыңыз.

4. Өзіңді құшақтау және мейірімділік (Self-compassionate touch)

Зерттеулерге сәйкес, адам өз жүрегіне немесе иығына қолын қойып, өзіне жылы сөздер айтқанда, 20 секунд ішінде ағзадағы стресс гормоны едәуір азаяды.

• Қалай жасау керек: Қолыңызды кеудеңізге қойып, алақанның жылуын сезініңіз және өзіңізге жақсы тілектер білдіріңіз.

Мамандардың пікірінше, бұл жаттығулардың бәрін бірдей жасау міндетті емес – өзіңізге ыңғайлы біреуін күнделікті әдетке айналдырсаңыз жеткілікті.