Алматыға 113 келі есірткі жеткізбек болған ағайындылар ұсталды

Алматы полициясы Жамбыл облысынан қалаға есірткі жеткізу арнасының жолын кесті. 113 келіден астам есірткі тәркіленіп, бұрын есірткі қылмыстары үшін сотталған ағайынды екі адам ұсталды. 

Алматы полиция департаментінің мәліметінше, арнайы жасақтың көмегімен Жамбыл облысының екі тұрғыны Алатау ауданында қолға түскен. Үйдің аумағын тексеру кезінде өсімдік тектес заттар жасырылған орындар анықталған. Екі қорап пен үш пакет есірткі, сондай-ақ каннабис тобына жататын 26 түп өсімдік тәркіленді. 

Сараптама тәркіленген заттардың ішінде 100 келіден астам кептірілген марихуана және 13 келіден астам гашиш болғанын көрсетті. Есірткінің жалпы салмағы 113 келіден асты. 

Екі күдікті де уақытша ұстау изоляторына қамалды. Қазір полиция есірткі жеткізу арнасына қатысы болуы мүмкін басқа адамдарды анықтап жатыр.