Павел Дуров Испаниядағы жаңа шектеулерге қатысты дабыл қақты: «Бұл - азаматтарды жаппай аңдуға жасалған қадам»

Telegram негізін қалаушы Павел Дуров Испания үкіметінің әлеуметтік желілерді реттеуге бағытталған жаңа бастамаларына шұғыл үн қатып, Педро Санчес кабинеті алға жылжытып жатқан төрт бірдей қауіпті трендті атап көрсетті. Миллиардердің пайымдауынша, 16 жасқа толмағандарға әлеуметтік желілерді пайдалануға тыйым салу және міндетті түрде жасты тексеру талабы азаматтардың құпиялылығын толық жойып, билікке әрбір испаниялықты жіті қадағалауға мүмкіндік береді. Оған қоса, платформа басшыларын «заңсыз» контент үшін қылмыстық жауапкершілікке тарту және алгоритмдерді бақылау - желілерді кез келген балама пікір мен саяси оппозицияны өшіруге мәжбүрлейтін қатаң цензураға әкеп соқтырмақ.

Дуров әсіресе платформалардың «қоғамдық іріткі салу» туралы есеп беру міндетін сынға алды; оның айтуынша, заңдағы бұлыңғыр тұжырымдар билікке ыңғайсыз ақпарат құралдарына қысым көрсету үшін таптырмас құрал болады.

«Бұл шаралардың қауіпсіздікке еш қатысы жоқ — бұл мемлекеттің адамдардың әр қадамын бақылауына бағытталған қадамдар. Испания, сақ бол!» — деп ескерткен кәсіпкер бұл реформалардың демократиялық бостандықтарға нұқсан келтіретініне сенімді.