Астанада Қазақ ұлттық спорт университетінің салтанатты ашылуы өтті

Астана қаласында Орталық Азиядағы спорт ғылымы мен жоғары білікті кадрлар даярлау саласындағы ауқымды жоба – Қазақ ұлттық спорт университетінің (ҚҰСУ) ресми ашылу рәсімі өтті. Жиын «New Era of Sport: KNUS 2026» халықаралық форумы аясында ұйымдастырылды.

Салтанатты шараға ҚР Туризм және спорт вице-министрі Серік Жарасбаев, Біріккен күрес әлемі (UWW) президенті Ненад Лалович, Халықаралық киберспорт федерациясының (IESF) басшысы Влад Маринеску, Дүниежүзілік допингке қарсы агенттік (WADA) өкілі Рафал Леше Пехота, сондай-ақ халықаралық спорт ұйымдарының жетекшілері, ғалымдар мен сала сарапшылары қатысты.

Университеттің ашылуы – еліміздегі спорттық білім беру жүйесін бес жыл бойы жүйелі жаңғырту жұмыстарының маңызды қорытындысы. Бүгінгі таңда оқу орны жоғары жетістіктер спорты, бұқаралық спорт және спорт индустриясы үшін заманауи білім беру экожүйесін қалыптастырып отыр.

Университеттің құрылтайшысы Нұрасыл Медеу өз сөзінде жаңа кампустың іске қосылуы мақсатты жұмыстың нәтижесі екенін атап өтті:

«Бес жыл ішінде біз берік іргетас қаладық. Бұл орталық болашақ чемпиондар мен ел көшбасшыларын, кәсіби жаттықтырушылар мен спорт дәрігерлерін тәрбиелейтін инновациялық білім ордасына айналады», – деді ол.

Халықаралық қонақтар өз кезегінде Қазақстанның спорт ғылымы мен білім беру саласындағы қадамын жоғары бағалады. UWW президенті Ненад Лалович пен IESF президенті Влад Маринескуге «Қазақ ұлттық спорт университетінің Құрметті профессоры» атағы берілді. Сондай-ақ, шара барысында студенттердің академиялық адалдық пен спорттық этиканы ұстануын көздейтін Студенттер хартиясына қол қою рәсімі өтті.

Жиынға қатысушылар университеттің заманауи ғылыми зертханалары, цифрлық инфрақұрылымы және инновациялық білім беру хабтарымен танысты.

Қазақ ұлттық спорт университеті алдағы уақытта халықаралық серіктестікті нығайтып, жаһандық спорт кеңістігінде отандық мамандардың бәсекеге қабілеттілігін арттыруды басты мақсат етіп қойып отыр.