Қазақстанда тегін берілетін дәрілер тізімі өзгерді

Қазақстанда амбулаториялық жағдайда тегін берілетін дәрі-дәрмектер тізімі жаңартылды. Оған 14 ауруды емдеуге арналған 22 заманауи дәрі қосылды, деп хабарлады Денсаулық сақтау министрі Ақмарал Әлназарова Үкімет отырысында.

Сонымен бірге 26 ауру бойынша қолданылатын 52 дәрі тізімнен алынды. Министрлік мұны аталған дәрілерге сұраныстың төмендігімен және тиімділігінің жеткіліксіздігімен түсіндірді.

Қазір Қазақстанда 76 ауру бойынша 2,1 млн адам амбулаториялық деңгейде тегін дәрі-дәрмек алады. Бұл мақсатқа шамамен 245 млрд теңге қарастырылған.

Бұдан бөлек, қант диабетімен ауыратын 21 жасқа дейінгі науқастарды, сондай-ақ жүкті әйелдерді инсулин сорғыларымен және оған қажетті шығыс материалдарымен қамтамасыз ету аясы кеңейтілді.

2025 жылдан бері тегін дәрілерді электронды рецептпен «Әлеуметтік әмиян» арқылы беру үлесі 82%-ға жеткен.

Денсаулық сақтау министрлігі 2027 жылға арналған дәрілерді сатып алуды былтырғыдан үш ай ерте бастаған. Қыркүйек айында қажетті көлемнің 84%-ы сатып алынды. Дәрі тапшылығының алдын алу үшін тұрақты сақталатын қор көлемі де 35%-ға ұлғайтылды.

Жоспар бойынша биылғы жылдың соңына дейін Бірыңғай дистрибьютор қоймаларында 2027 жылға қажетті дәрі-дәрмектің 95–100%-ы болуы тиіс.