«Ұлымды өлтіргеніне дәлелім бар»: әскерде қаза тапқан сарбаздардың аналары әділдік талап етті

Қазақстан әскерінде әр жылдары қаза тапқан сарбаздардың аналары Алматыда баспасөз мәслихатын өткізіп, ұлдарының өліміне қатысты істерді әділ тергеуді және кінәлілерді жауапқа тартуды талап етті, деп хабарлады ҚазТАГ.

Жиында әскерде қаза тапқан Қайсар Сұлтановтың анасы Сәуле Тілеубергенова ұлының өліміне қатысты істің үшінші жыл бойы өзіне қол жұмсау дерегі ретінде тергеліп жатқанын айтты. Ол тергеудің бұл тұжырымымен келіспейді.

«Ұлымның иек тұсына екі рет оқ тиген. Екі оқтың арасында 5–6 минут уақыт өткен. Үшінші жыл іс суицид бабы бойынша қаралып жатыр. Бірақ бұған дәлел жоқ. Ұлымның өлтірілгеніне бұлтартпас дәлелдерім бар. Сараптама қорытындылары да бар», – деді Сәуле Тілеубергенова.

Ол тек өз ұлының емес, әскери қызмет кезінде қаза тапқан басқа да сарбаздардың өліміне қатысты істердің әділ қаралуын сұрады.

«Бізге әскер керек, бірақ мұндай әскер емес. Ұлымның өлімі әділ тергеліп, кінәлілердің жазалануын талап етемін», – деді сарбаздың анасы.

Жиынға қатысқан аналар әрбір өлім дерегін жан-жақты тергеуді, мұндай қайғылы оқиғалардың қайталануына жол бермеуді және Қазақстанның Қарулы күштерінде жүйелі өзгерістер жүргізуді талап етті.

Баспасөз мәслихаты кезінде күтпеген жағдай болды. Алматыдағы Қазақстан халықаралық адам құқықтары бюросының баспасөз орталығында электр жарығы сөніп, өзге өңірлерден бейнебайланыс арқылы қосылуы тиіс аналармен байланыс үзілді.

Ұйымдастырушылар жиынды уақытша тоқтатуға мәжбүр болды. Біраз уақыттан кейін баспасөз мәслихаты қайта жалғасқанымен, электр жарығы екінші рет сөнді.

Жарықтың неліктен сөнгені белгісіз. Оқиғаға қатысты құзырлы органдардың түсініктемесі берілген жоқ.