Қазақстандық жас футболшылар Ташкентте ауруханаға түсті: СІМ мәлімдеме жасады

Ташкентте халықаралық футбол турниріне қатысып жүрген қазақстандық балалар денсаулығы күрт нашарлап, ауруханаға жеткізілді. Қазақстан Сыртқы істер министрлігі ZTB басылымына балалардың ауруханаға түскенін растады.

Ведомство мәліметінше, жас футболшылар Ташкентте өтіп жатқан Dostlik Cup 2026 халықаралық футбол фестиваліне қатысқан.

«Көмекке мұқтаж Қазақстан азаматтарының барлығы Өзбекстан Республикасының мамандандырылған медициналық мекемелеріне жатқызылды. Оларға қажетті көмек көрсетіліп жатыр», – деп хабарлады министрлік.

Қазақстандық дипломаттар балалардың туыстарымен байланысқан. СІМ жағдайды бақылауда ұстап отырғанын мәлімдеді.

Бұған дейін Қарағандыдан Ташкентке футбол турниріне барған балалардың ата-аналары олардың денсаулығы күрт нашарлағанын хабарлаған. Туыстарының айтуынша, 31 қазанда қонақүйлердің бірінде таңғы ас ішкеннен кейін балалардың іші ауырып, дене қызуы көтерілген.

Ата-аналардың бірі 11 баланың зардап шегуі мүмкін екенін айтқан. Әлеуметтік желіде балалардың улануы мүмкін деген ақпарат та тарады.

Алайда балалардың денсаулығының нашарлауына нақты не себеп болғаны әзірге ресми түрде жарияланған жоқ. Сондай-ақ СІМ ауруханаға жеткізілген қазақстандықтардың нақты санын хабарламады.