Президент Жолдауы: ШҚО-да 2027 жылға арналған міндеттер айқындалды

Шығыс Қазақстан облысында Президенттің «Жаңа тарихи кезеңдегі Қазақстанның өзекті міндеттері» атты Қазақстан халқына Жолдауын талқылауға арналған облыс активінің отырысы өтті. Жиынға өңір әкімі Нұрымбет Сақтағанов төрағалық етті. Басқосуда экономика, тұрғын үй құрылысы, денсаулық сақтау, цифрландыру және өнеркәсіпті дамыту мәселелері қаралды.

Облыстық Экономика және бюджеттік жоспарлау басқармасының басшысы Нұрсұлтан Маратов Мемлекет басшысы халықтың табысын арттыру мен инфляцияны тежеуді басты міндеттердің бірі ретінде белгілегенін айтты.

«1 қарашадағы жағдай бойынша өңірдегі жылдық инфляция 9 пайызды құрады. Қалалар мен аудандарда бағаның өсуіне әсер ететін себептерді жою қажет. Атап айтқанда, тауар тапшылығын болдырмау, сақтау кезіндегі шығынды азайту, тасымал шығындарын қысқарту және өндіруші мен тұтынушы арасындағы артық делдалдарды азайту маңызды. Өңірде халық табысын арттырудың 2026–2029 жылдарға арналған кешенді жоспары іске асырылып жатыр. Оның аясында тұрақты жұмыс орындарын ашуға, мамандар даярлауға, кәсіпкерлік пен өзін-өзі жұмыспен қамтуды дамытуға басымдық беріледі», – деді Нұрсұлтан Маратов.

Тұрғын үй құрылысы қарқын алады

Облыстық Құрылыс, сәулет және қала құрылысы басқармасының басшысы Руфат Акрамовтың мәліметінше, 2025 жылы Шығыс Қазақстанда 407,4 мың шаршы метр тұрғын үй пайдалануға берілген. Биыл бұл көрсеткішті 408,4 мың шаршы метрге жеткізу жоспарланып отыр.

Қазір өңірде жалпы ауданы 961,1 мың шаршы метр тұрғын үй салынып жатыр. Оның 859,8 мың шаршы метрі көппәтерлі үйлерге, 101,3 мың шаршы метрі жеке тұрғын үйлерге тиесілі.

Денсаулық сақтау саласындағы маңызды жобалардың бірі – Өскемендегі Гематология орталығының құрылысы аяқталды. Бұл Қазақстанда баламасы жоқ медициналық нысан ретінде таныстырылды. Сонымен қатар қалада 300 орындық көпбейінді аурухана салынып жатыр. Оны 2027 жылдың желтоқсанында пайдалануға беру жоспарланған.

Бұдан бөлек, Онкология және хирургия орталығының хирургиялық ғимаратын қайта жаңарту, Ана мен бала орталығының стационарын перзентханаға бейімдеу жұмыстары жүргізілуде. Екі нысанды да жыл соңына дейін ашу көзделген.

Спорт нысандарының құрылысы да жалғасып жатыр. Өскеменде Волейбол орталығы салынып, қазан айының соңында Республикалық ұлттық үстел теннисі академиясының спорт кешенінің құрылысы басталды.

Алты жылда 45 медициналық нысан ашылды

Облыстық Денсаулық сақтау басқармасының басшысы Төлеген Жігітаев өңірде медициналық қызметтің қолжетімділігін арттыру, ауруханаларды жаңарту және маман тапшылығын азайту бағытында атқарылып жатқан жұмыстарға тоқталды.

«2021–2026 жылдары облыста 45 денсаулық сақтау нысаны пайдалануға берілді. Жас мамандарды тарту үшін медициналық ұйымдардың басшылары Семей медициналық университетінің түлектерімен кездесулер өткізуде. Ауылға жұмысқа барған 28 медицина қызметкеріне біржолғы ақшалай төлем берілді. Сонымен қатар дәрігерлердің кәсіби біліктілігін арттыруға ерекше көңіл бөлініп отыр. 2026 жылы 29 маман шетелдің жетекші клиникаларында білімін жетілдірді. Оқу Германия, Израиль, Ресей, Түркия және Беларусь елдерінде ұйымдастырылды», – деді Төлеген Жігітаев.

204 елді мекен жоғары жылдамдықты интернетке қосылады

ШҚО Цифрландыру және архивтер басқармасының басшысы Қайрат Бимағамбетов өңірде жүзеге асырылып жатқан цифрлық жобалар туралы баяндады.

Оның айтуынша, «Ақпараттық технологиялар орталығы» негізінде Аймақтық талдау орталығы жұмыс істейді. Мұнда 108 ведомстволық цифрлық тізілім жасалған. Қала инфрақұрылымын бақылау үшін ұшқышсыз ұшу аппараттары мен арнайы датчиктер пайдаланылады.

«Орталыққа 25 экологиялық бекеттен, жылумен жабдықтау жүйесіндегі 23 датчиктен, тұрмыстық қалдықтарды бақылау жүйесінен және гидрологиялық бекеттерден мәлімет түседі. Қазір 569 қоқыс контейнері алаңы мен 52 арнайы техника цифрлық бақылауға алынған. Бұл қоқыс шығару кестесінің сақталуын қадағалауға мүмкіндік береді», – деді басқарма басшысы.

Өңірде 243 фото және бейнетіркеу құрылғысын біріктіретін «Мерген» жүйесі де жұмыс істейді. Алты ұшқышсыз ұшу аппараты арқылы 10 мың гектардан астам аумақ зерттелген. Сондай-ақ 24 гидрологиялық бекеттің жұмысы автоматтандырылған.

Қазір облыс халқының 99 пайызы тұратын елді мекендер байланыс және интернетпен қамтылған. «Қолжетімді интернет» ұлттық жобасы аясында тағы 204 елді мекенге жоғары жылдамдықты интернет жеткізу жоспарланып отыр.

Өңірде 250-ге жуық пайдалы қазба кен орны бар

Облыстық Кәсіпкерлік және өнеркәсіп басқармасының басшысы Исатай Аңсат Шығыс Қазақстанның жер қойнауын игеру мүмкіндіктеріне тоқталды.

Оның айтуынша, облыста пайдалы қазбалардың 250-ге жуық кен орны бар. Соның 129-ы кең таралған пайдалы қазбалар қатарына жатады. Бұл қорлар тұрғын үй және инфрақұрылым құрылысына қажетті материалдар өндіру үшін маңызды.

«Облыстың құрылыс материалдарына деген сұранысын толық қамтамасыз ету үшін жергілікті шикізат қорын тиімді пайдалануымыз керек. Сонымен бірге өнеркәсіптік игеруге болатын жаңа кен орындарын іздеу және барлау жұмыстарына басымдық беріліп отыр. Ол үшін өңірдің минералдық-шикізат қорына жан-жақты талдау жүргізіліп, болашағы бар және қосымша қор ретінде қарастырылатын кен орындары анықталады. Оларды игерудің тиімділігі бағаланып, геологиялық барлау жұмыстары жүргізіледі», – деді Исатай Аңсат.

Осы бағыттағы жұмысты үйлестіру үшін облыс әкімінің жанынан Критикалық материалдар және тұрақты металлургия жөніндегі жобалық кеңсе құрылған. Оның міндеті – ғылыми ұйымдар, жоғары оқу орындары мен өнеркәсіп кәсіпорындарының байланысын нығайтып, өңірдің ғылыми-технологиялық мүмкіндіктерін дамыту.

Жоба аясында ірі кәсіпорындарды тарту, оларға Шығыс Қазақстанның өндірістік және шикізаттық әлеуетін таныстыру көзделіп отыр.

Облыс әкімі 2027 жылға арналған құрылыс жобаларын әзірлеуді тапсырды

Жиынды қорытындылаған облыс әкімі Нұрымбет Сақтағанов 2027 жыл – Жалпыхалықтық ауқымды құрылыс жылы Шығыс Қазақстан үшін нақты нәтижелерге қол жеткізетін кезең болуы керектігін айтты. Оның сөзінше, жаңа нысандар салумен қатар, қолданыстағы инфрақұрылымның сапасын жақсарту маңызды.

«2027 жылға арналған басым құрылыс жобаларының жинақталған тізімін әзірлеу қажет. Денсаулық сақтау саласында алғашқы медициналық көмектің, мамандандырылған және жоғары технологиялық медициналық қызметтің қолжетімділігін арттыруымыз керек. Кәсіпкерлік және өнеркәсіп басқармасы, қала және аудан әкімдері өңірдің минералдық-шикізат қорына талдау жасап, сирек және сирек жер металдарын қоса алғанда, геологиялық барлаудың келешегі бар бағыттарын айқындауы тиіс», – деді өңір басшысы.

Нұрымбет Сақтағанов Президент бастамаларын қолдау жеткіліксіз екенін, оларды жергілікті жерде жүзеге асыратын нақты шаралар қажет екенін атап өтті.

«Біздің міндетіміз – Мемлекет басшысының бастамаларын қолдайтынымызды айтумен ғана шектелмей, оларды іске асырудың нақты жолдарын белгілеу. Әр тапсырма мемлекеттік органдардың күнделікті жұмысынан көрініс тауып, оның нәтижесін халық сезінуі керек», – деді облыс әкімі.