Қорғау тарапы шақырған куәгерлердің өздері Боқаев адвокаттарының сөзіне қайшы келетін мәліметтер берді

Санжар Боқаевқа қатысты өтіп жатқан сот процесі күтпеген арнаға бұрылды. Қорғаушылар сотқа шақыртқан негізгі куәгерлердің жауаптары керісінше айыптау тарапының нұсқасын бекіте түсті.

«ҚазТрансГаз Өнімдері» АҚ-ның бұрынғы бас директоры Әлік Аширов сотта сотталушының жиені Мадияр Қалменовті мүлде танымайтынын мәлімдеді. Ал тергеу деректеріне сүйенсек, автошеруді ұйымдастыруға бөлінген ондаған миллион теңге дәл осы Қалменовке тиесілі «BM Trust» компаниясы арқылы қолма-қол ақшаға айналдырылған. Аширов жобаның бас ұйымдастырушысы ретінде тек Жұлдыз Артықбаеваның компаниясын білетінін және барлық жұмыс кеңестеріне тек солар қатысқанын жеткізді.

«Business Travel Management» ЖШС-ның бұрынғы басшысы Әзиз Ғазиев те сотта маңызды айғақтар келтірді.Оның айтуынша, «ҚазТрансГаз» ішіндегі барлық қаржылық әрі ұйымдастырушылық шешімдерді тікелей Боқаевтың өзі қабылдап отырған. Әуе билеттері мен қонақүй қызметтерін ұсынған компания таныстырылымы да басқа лауазымды тұлғаларға емес, арнайы Боқаевтың өзіне өткізілген.

Сонымен қатар Алматыдағы «Ramada» қонақүйін басқаратын «Salem hotel management» ЖШС басшысы С.Бабель 2018 жылғы конференция шығындарын жиені емес, «We Can» ЖШС толығымен төлегенін түбіртектермен растады. Мұндай бұлтартпас айғақтардан соң қорғаушы тарап істің негізгі мән-жайынан ауытқып, қонақүйдің ғимараты, жұлдыз саны мен асхана сыйымдылығы сияқты екінші дәрежелі сұрақтарға өтіп, процесті созу тактикасына көшті.