Қазақстанда 78 медициналық ұйым лицензиясынан айырылды

Қазақстанда 2026 жылдың тоғыз айында заң талаптарын бұзған 78 медициналық ұйымның лицензиясы кері қайтарылды. Олардың арасында стоматологиялық клиникалар да бар, деп хабарлады Денсаулық сақтау министрлігі.

Министрліктің Медициналық және фармацевтикалық бақылау комитеті тоғыз айдағы бақылау және қадағалау жұмысының қорытындысын жариялады.

Тексеру барысында аумақтық департаменттер заң талаптарын бұзған медициналық ұйымдардың лицензиясын сот арқылы тоқтату рәсімдерін бастаған. Нәтижесінде 78 медициналық ұйым қызмет көрсету құқығынан айырылды.

Министрліктің мәліметінше, бұл шара пациенттердің қауіпсіздігін қамтамасыз етуге, лицензиялық талаптардың сақталуын бақылауға және медициналық қызмет көрсетушілердің жауапкершілігін арттыруға бағытталған.

Ведомство медициналық көмек көрсету құқығы заң талаптары мен қауіпсіздік талаптарын мүлтіксіз сақтаумен қатар жүруге тиіс екенін атап өтті.