Қазақстанда Stadler пойыздары қатынай бастайды: билет бағасы мен кестесі белгілі болды

Қазақстанда Stadler компаниясы шығарған жаңа вагондардан құралған пойыздар 11 қарашадан бастап жолаушы тасымалдайды. Алғашқы пойыздар Астанадан Алматы мен Семейге қатынайды. Билеттер 5 қарашадан бастап сатылады, деп хабарлады «Жолаушылар тасымалы» компаниясы.

Астана – Алматы бағытындағы алғашқы пойыз 11 қарашада, ал Астана – Семей бағытындағы пойыз 13 қарашада жолға шығады.

«Бүгінде "Жолаушылар тасымалы" АҚ Stadler компаниясы шығарған 100-ден астам вагонды қабылдады. Оларды кезең-кезеңімен пайдалануға беру жолаушылардың жайлылығын арттырып, қызмет көрсету сапасын жақсартуға мүмкіндік береді», – деді компанияның басқарма төрағасы Ануар Ахметжанов.

Жаңа вагондарда қандай жағдай жасалған?

Stadler вагондары Қазақстанның климаттық ерекшеліктерін ескере отырып, Stadler Kazakhstan зауытында шығарылады.

Купелі вагондар 40 жолаушыға, ал ашық жатын орындары бар вагондар 56 жолаушыға арналған.

Вагондарда мынадай жабдықтар қарастырылған:

• Ауа температурасын реттеу жүйесі;

• Әр жолаушыға арналған жеке жарық шамдары;

• 220 вольттық электр розеткалары;

• USB және USB-C қуаттау ұяшықтары;

• Бейнебақылау жүйелері.

Сондай-ақ жүріп-тұруы қиын жолаушыларға арнайы жағдай жасалған. Пойыз құрамында тамақтануға арналған вагондар да болады.

Пойыздар қай уақытта жүреді?

Астана – Алматы бағыты

№3/4 «Нұрлы жол – Алматы-2» пойызы күн сайын қатынайды.

• «Нұрлы жол» бекетінен сағат 13:10-да шығып, келесі күні 08:30-да «Алматы-2» бекетіне жетеді.

• «Алматы-2» бекетінен 12:12-де шығып, келесі күні 07:03-те «Нұрлы жол» бекетіне келеді.

Астана – Семей бағыты

№153/154 «Нұрлы жол – Семей» пойызы айдың тақ күндері қатынайды.

• «Нұрлы жол» бекетінен 16:40-та шығып, келесі күні 06:10-да Семейге жетеді.

• Семейден 15:00-де шығып, келесі күні 05:05-те «Нұрлы жол» бекетіне келеді.

Билет қанша тұрады?

Жаңа пойыздардағы билет бағасы бағыт пен вагон түріне байланысты.

Көрсетілген бағалар – билеттердің бастапқы құны.

Stadler пойыздары неге кешігіп іске қосылды?

Бұған дейін Көлік вице-министрі Жәнібек Тайжанов Stadler вагондары қазан айының соңы мен қараша айының басында пайдалануға берілуі мүмкін екенін айтқан.

Алғашқы вагондарды «Жолаушылар тасымалы» компаниясына 2025 жылғы желтоқсанда тапсыру жоспарланған еді. Алайда жеткізу мерзімі кейінге шегерілді.

Бұған Швейцария мен Қазақстандағы техникалық талаптардың айырмашылығы, вагон құрылымын реттеу жұмыстары және анықталған техникалық ақаулар себеп болғаны хабарланды.

16 маусымда Премьер-министр Олжас Бектенов вагондарды жеткізуді жеделдетіп, алдағы уақытта мұндай кідірістерге жол бермеуді тапсырған.

Енді алғашқы Stadler пойыздары қараша айында жолаушы тасымалын бастайды. Жаңа вагондар кезең-кезеңімен пайдалануға беріледі.