«Ұмай» ипотекасы қайта басталды: екінші кезеңге 20 млрд теңге бөлінді

Қазақстанда әйелдерге арналған «Ұмай» ипотекалық бағдарламасының екінші кезеңіне өтінім қабылдау басталды. Отбасы банк бұл кезеңге 20 млрд теңге қарастырған.

Бағдарлама бойынша ең жоғары несие сомасы – 50 млн теңге. Мөлшерлеме жылына 14,8%, жылдық тиімді сыйақы мөлшерлемесі 16,3%-дан 16,8%-ға дейін. Қатысушының орташа айлық таза табысы 1 млн 250 мың теңгеден аспауға тиіс. Сондай-ақ соңғы алты айдағы ресми табысы болуы қажет.

«Ұмай» арқылы пайдалануға берілген жаңа үйді, құрылысы жүріп жатқан баспананы және қайталама нарықтағы тұрғын үйді сатып алуға болады. Қайталама нарықтағы үй 2016 жылдан ерте салынбауы керек. Құрылысы аяқталған жаңа баспана банктің «Баспана Маркет» алаңы арқылы таңдалады. Ал салынып жатқан үйге Қазақстан тұрғын үй компаниясының кепілдігі немесе сақтандыру тетігі болуы қажет.

Бағдарламаның ерекшелігі – сатып алынған баспана әйелдің атына рәсімделеді. Егер қарыз алушы некеде болса, тұрғын үй ерлі-зайыптылардың ортақ мүлкі саналады. Несиеге өтінім берген кезде жұбайының өзі келуі қажет.

Банк өтінім берер алдында мерзімі өткен қарыздың, салық берешегі мен өсімпұлдың, төленбеген айыппұлдың бар-жоғын тексеруді ұсынады. Сонымен бірге Бірыңғай жинақтаушы зейнетақы қорына міндетті жарналардың уақытылы аударылуы мен қолданыстағы несие шектеріне назар аудару қажет.

«Ұмай» бағдарламасының алғашқы кезеңі 31 тамызда өткен. Сол кезде бөлінген 9 млрд теңге жоғары сұранысқа байланысты бір күнде таусылып, банк 855 өтінім қабылдаған. Бағдарламаны қаржыландыруға Азия даму банкі қаражат береді.