Астанада Президент Жолдауын жүзеге асырудағы БАҚ-тың рөлі талқыланды

5 қараша күні Астанада «Қазақ газеттері» ЖШС мен «Бас редакторлар клубы» республикалық қоғамдық бірлестігінің ұйымдастыруымен Мемлекет басшысының Қазақстан халқына арнаған Жолдауына арналған дөңгелек үстел өтті.

«Егемен Қазақстан» газетінің редакциясында өткен жиынға республикалық басылымдардың басшылары, Бас редакторлар клубының өкілдері мен Мемлекеттік басқару академиясының магистранттары қатысты.

Кездесуде Президенттің 2026 жылғы 28 қазандағы «Жаңа тарихи кезеңдегі Қазақстанның өзекті міндеттері» атты Жолдауында көтерілген мәселелер талқыланып, мемлекеттік бастамаларды қоғамға түсіндірудегі бұқаралық ақпарат құралдарының рөлі сөз болды.

Жиын барысында «Бас редакторлар клубы» республикалық қоғамдық бірлестігінің вице-президенті Мұратбек Тоқтағазин, «Egemen Qazaqstan» газетінің бас редакторы Ғабит Мүсіреп және «Казахстанская правда» газетінің бас редакторы Сәбит Малдыбаев медиа саласының бүгінгі міндеттері мен қоғамдық коммуникацияның маңызына тоқталды.

Сондай-ақ «Қазақ газеттері» ЖШС бас директорының орынбасары Қуат Әуесбай серіктестікке қарасты басылымдардың қызметі мен негізгі бағыттары туралы таныстырылым жасады.

Дөңгелек үстелге қатысқан QRNEWS.kz ақпараттық агенттігінің директоры, «Бас редакторлар клубы» республикалық қоғамдық бірлестігінің вице-президенті Қанат Сапарғали журналистер мен мемлекеттік қызметкерлер арасындағы байланысты нығайтудың маңызын атап өтті. Ол мемлекеттік органдар мен бұқаралық ақпарат құралдары арасындағы ашық әрі тиімді диалог қоғамды шынайы ақпаратпен қамтамасыз етуге және өзекті мәселелерді дер кезінде көтеруге мүмкіндік беретінін айтты.

Жиында цифрландыру мен жасанды интеллектіні енгізу мәселелері де назардан тыс қалмады. Мемлекет басшысының «Жасанды интеллектінің көмегімен қайталанатын міндеттерді, басқару жүйесіндегі қарама-қайшылықтарды жою керек» деген тапсырмасы аясында медиа саласының алдында тұрған жаңа міндеттер талқыланды.

Кездесу аясында қатысушылар «Egemen Qazaqstan» және «Казахстанская правда» газеттерінің редакцияларымен танысып, басылымдардың жұмыс үдерісі мен ақпарат тарату тәжірибесін зерделеді.

Дөңгелек үстелдің «Мемлекеттік басқару және қоғамдық коммуникация» тақырыбындағы бөлімінде мемлекеттік органдар мен қоғам арасындағы ашық байланысты дамыту, ақпараттық саясаттың тиімділігін арттыру және Президент Жолдауында белгіленген міндеттерді ақпараттық сүйемелдеу мәселелері қарастырылды.

Жиында айтылғандай, ақпарат кеңістігінде көзбояушылыққа жол бермей, нақты дерек пен шынайылыққа сүйену, қоғамға маңызды ақпаратты түсінікті әрі уақтылы жеткізу – кәсіби журналистиканың басты міндеттерінің бірі.