Енді әркім өз зейнетақысының тағдырын өзі шешеді

Қазақстандықтар енді зейнетақы жинағын қалай инвестициялау керектігін өздері дербес таңдай алады, өйткені Қаржы нарығын реттеу және дамыту агенттігі зейнетақы активтерін басқару саласына үлкен өзгерістер енгізді.

Енді жеке инвестициялық портфельді басқарушылар (ЖИБ) азаматтарға бір емес, бірден үш түрлі инвестициялық стратегия ұсына алады. Бұл әрбір салымшыға жинағын қауіпсіздік деңгейі мен табыстылығына қарай бөліп, тәуекелді өз бетінше реттеуге мүмкіндік береді.

Осы орайдағы басты өзгерістердің бірі - бұған дейін жинақтың тек 50%-ын жеке компанияларға сеніп тапсыруға рұқсат етілсе, енді азаматтар өз жинағының толық 100%-ын бере алады. Салымшылар ақшасын аз тәуекелі бар қауіпсіз немесе табысы мол болуы мүмкін тәуекелі жоғары бағыттарға өздері бөліп орналастыра алады.

Бұл ретте қаражат БЖЗҚ-дағы жеке шотыңызда қауіпсіз сақталып, оның есебін бөлек кастодиан-банк қатаң қадағалайды. Егер жеке компания белгіленген минималды табыстылық деңгейін қамтамасыз ете алмаса, жетпей қалған айырманы өзінің меншікті қаражаты есебінен салымшыға өтеп беруге тиіс.

Бүгінгі таңда еліміздегі алты жеке компания салымшылардың 205,8 миллиард теңгеден астам зейнетақы жинағын басқарып отыр, ал бұл көрсеткіш жыл басынан бері 132,7%-ға өскен.

Сонымен қатар қалаған азаматтар өз жинақтарын Ұлттық банктің басқаруында қалдыру құқығын толықтай сақтап қалады.