Қазақстандық балалардың жаппай улануы: Өзбекстанда қылмыстық іс қозғалды

Ташкентте балалар арасындағы футбол турниріне қатысқан қазақстандықтардың жаппай улануына байланысты қылмыстық іс қозғалды. Бұл туралы Өзбекстанның Бала құқықтары жөніндегі уәкілі хабарлады.

Істі Ташкенттің Чиланзар ауданының прокуратурасы санитарлық заңнаманы немесе індетке қарсы күрес ережелерін бұзу бабымен тергеп жатыр. Қазір Ташкент қаласындағы №5 жұқпалы аурулар ауруханасында 18 адам жатыр, оның 12-сі – бала. Бұған дейін ауруханаға түскен 17 адам туралы хабарланған еді.

Өзбекстан Денсаулық сақтау министрлігінің мәліметінше, науқастарға жіті диарея диагнозы қойылған. Екі адам ауруханадан шығарылды. Қалғандарының жағдайы тұрақты әрі қанағаттанарлық деп бағаланып отыр.

Санитариялық-эпидемиологиялық қызмет тағам үлгілерін зертханада тексеріп жатыр. Улануға нақты не себеп болғаны әзірге анықталған жоқ.

Қарағанды облысынан Ташкенттегі Dostlik Cup 2026 халықаралық футбол турниріне барған балалар 31 қазанда өздерін жайсыз сезіне бастаған. Олардың дене қызуы көтеріліп, іші ауырып, құсу және іш өту белгілері байқалған.

Бұған дейін балалардың ата-аналары ауруханадағы жағдайға және зерттеу нәтижелерінің берілмегеніне шағымданған. Олардың сөзінше, бастапқыда науқастар жөндеу жүріп жатқан ауруханаға орналастырылып, кейбір дәріні өздері сатып алуға мәжбүр болған. Қазақстан консулдығына жүгінгеннен кейін науқастарды басқа емдеу мекемесіне ауыстыру басталған.

Қазақстанның Өзбекстандағы елшілігі дипломаттар зардап шеккендермен және олардың туыстарымен байланыста екенін хабарлады. Қазақстан елшісі ауруханаға барып, балалардың ата-аналарымен кездесті. Жағдай екі елдің денсаулық сақтау органдарының бақылауында.