Қазақстандықтардың банктегі депозитіне салық салына ма? Министрлік жауап берді

Қазақстанда азаматтардың банктегі депозиттерінен алатын сыйақысына салық енгізу жоспарланып отырған жоқ. Ұлттық экономика министрлігі әлеуметтік желілерде тараған ақпаратты жоққа шығарды, деп хабарлады Жалған ақпаратқа қарсы іс-қимыл орталығы.

Орталықтың 5 қарашадағы мәліметінше, бұған дейін ресми түсіндірме берілгеніне қарамастан, әлеуметтік желілерде жеке тұлғалардың депозиттерінен түсетін табысқа салық салынады деген хабарламалар әлі де таралып жатыр.

Министрлік бұл ақпараттың шындыққа жанаспайтынын мәлімдеді.

«Қазақстан Республикасы Салық кодексінің 430-бабына сәйкес, жеке тұлғалардың банктік салымдары (депозиттері) бойынша алатын сыйақысына жеке табыс салығы салынбайды», – делінген ведомство түсіндірмесінде.

Ұлттық экономика министрлігі Үкімет мұндай салықты енгізу мәселесін қарастырып отырмағанын да атап өтті.

Депозитке 5% салық салынады деген ақпарат қайдан шықты?

Бұған дейін, 27 тамызда, әлеуметтік желілерде банктік салымдардан түсетін сыйақыға 5% салық енгізілетіні туралы хабар тараған.

Сол кезде Ұлттық экономика министрлігі бұл мәліметті жоққа шығарып, депозит сыйақысына жеке табыс салығын салмау туралы қолданыстағы норманы өзгерту жоспарланбағанын хабарлаған.

Алайда арада екі айдан астам уақыт өткен соң осы мазмұндағы ақпарат қайта тарала бастаған.

Жалған ақпаратқа қарсы іс-қимыл орталығы азаматтарды тек ресми дереккөздерге сүйенуге және тексерілмеген мәліметтерді таратпауға шақырды.

Орталық көрінеу жалған ақпаратты қасақана таратқандар заңда көзделген негіздер болған жағдайда жауапқа тартылуы мүмкін екенін де ескертті.