Қазақстанда үш жаңа әуежай қашан ашылатыны белгілі болды

Қазақстанда Зайсан, Қатонқарағай және Кендірлідегі жаңа әуежайларды 2027 жылғы мамырда пайдалануға беру жоспарланып отыр. Бұл туралы Премьер-министрдің орынбасары – Ұлттық экономика министрі Серік Жұманғариннің Үкімет отырысына арналған баяндамасында айтылған.

Сонымен бірге 2027 жылғы маусымда Астанада тағы бір әуежайдың құрылысы басталмақ. Жобаға ірі халықаралық компанияны тарту көзделген.

Бұл жұмыстар Мемлекет басшысының 2026 жылғы 28 қазандағы Жолдауын іске асыру жөніндегі Жалпыұлттық іс-шаралар жоспарының жобасына енгізілген. Құжат 12 бағыт бойынша 96 іс-шарадан тұрады, оның 80-ін Үкімет жүзеге асыруы тиіс.

Көлік және логистика саласындағы жоспар мұнымен шектелмейді. 2027 жылдың соңына дейін «Бақты – Аягөз» теміржол желісін пайдалануға беру жоспарланған.

Сондай-ақ республикалық және жергілікті жолдарды салу мен қайта жаңарту жалғасады. Оның ішінде «Арал – Каспий» және «Көкшетау – Петропавл» күре жолдары бар.

Жоспарда барлық автокөлік өткізу бекеттерін толық қайта жаңарту және зияткерлік көлік жүйесін енгізу арқылы жүк тасымалын электрондық құжаттарға көшіру де қарастырылған.