«20 жылдан бері террористпін»: Атырауда екі әйелдің тікелей эфирі сотқа ұласты

Атырауда әлеуметтік желідегі тікелей эфир кезінде өзін «террористпін» деп таныстырған әйел мен оның жанындағы адамға қатысты үш әкімшілік іс қозғалды, деп хабарлады Атырау облысының полиция департаменті.

Оқиға қаладағы сауда орындарының бірінде болған. 38 және 39 жастағы екі әйел TikTok желісінде тікелей эфир жүргізіп, әтір сатып отырған. Сол кезде олардың бірі өзін 20 жылдан бері террорист екенін айтып, Ұлттық қауіпсіздік комитетінің қызметкерлері оны жақсы танитынын мәлімдеген.

Бейнежазба әлеуметтік желіде тарағаннан кейін полиция екі әйелдің жеке басын анықтап, оларды полиция басқармасына жеткізді.

Полицияның мәліметінше, әйелдерге қатысты ұсақ бұзақылық, құқыққа қайшы мазмұндағы ақпарат тарату және қоғамдық орында адамның бет-жүзін тануға кедергі келтіретін киім кию деректері бойынша үш әкімшілік іс қозғалған. Жиналған материалдар сотқа жолданды.

Сонымен қатар екі әйелмен теологтың қатысуымен түсіндіру жұмыстары жүргізілді. Оларға заң талаптары мен қоғамдық тәртіп ережелері түсіндірілген.

«Әлеуметтік желілер – заң талаптары қолданылмайтын орта емес. Тікелей эфир кезінде де жасалған кез келген құқыққа қайшы әрекетке заң аясында тиісті баға беріліп, кінәлі тұлғалар қолданыстағы заңнамаға сәйкес жауапкершілікке тартылады», – деп мәлімдеді полиция департаменті.

Әзірге сот шешімі жарияланған жоқ. Әйелдердің терроризмге қатысы бары туралы ресми мәлімет жоқ.