23 мың видео, 459 бүлдіршін: Австралия тарихындағы ең ірі педофилия ісі әшкереленді

Австралияның Квинсленд штатының полициясы ел тарихындағы ең ірі киберқылмыстардың бірін әшкереледі.Ойын платформалары мен әлеуметтік желілерде балаларды әдейі нысанаға алған 27 жастағы ер адамға 459 құрбанға қатысты 596 айып тағылды, деп хабарлайды BBC.

Күдікті 2018 жылдан 2025 жылға дейін әртүрлі онлайн-профильдер ашып, өзін ер адам немесе әйел ретінде таныстырып келген. Ол танымал қосымшалар мен ойындар арқылы 7 мен 15 жас аралығындағы балалардың сеніміне кіріп (груминг), оларды мәжбүрлеу немесе бопсалау арқылы жыныстық сипаттағы материалдар жіберуге көндірген. Тінту кезінде оның электронды құрылғыларынан 23 мыңнан астам фото мен видео табылды. Ол бұл файлдарды папкаларға бөліп, мұқият сақтап отырған.

Полиция мәліметінше, зардап шеккен 459 баланың 200-ден астамы Австралияда, қалғандары әлемнің 15 елінде, негізінен ағылшын тілді мемлекеттерде тұрады. Қазіргі таңда 360 баланың жеке басы анықталды. Тергеушілер халықаралық серіктестермен бірлесіп, қалған құрбандарды іздестіру және оларға психологиялық көмек көрсету жұмыстарын жүргізіп жатыр.

Детектив Дензил Кларк балалардың танымал ойындар мен желілер арқылы осындай қауіпке жиі ұшырайтынын ескертті.

«Бұл баланың психикасына орны толмас зақым келтіреді. Қылмыскерлер балаларды алдап, қорқытып, өздерінің аятсыз мақсаттарына пайдаланады», - деді ол.

Күдіктіге қатысты сот отырысы осы бейсенбіде өтеді. Қазіргі уақытта полиция бұл іске қатысы бар басқа да тұлғаларды тексеру үстінде.