Тоқаев Вице-Президенттің өкілеттіктерін бекітті

Президент Қасым-Жомарт Тоқаев «Қазақстан Республикасы Вице-Президентінің өкілеттіктері туралы» Жарлыққа қол қойды. Құжатта Вице-Президенттің міндеттері мен құқықтары айқындалған.

Жарлыққа сәйкес, Вице-Президент мемлекеттің ішкі және сыртқы саясаты бойынша стратегиялық бастамаларды әзірлеуді қамтамасыз етіп, оларды Президентке ұсынады. Сондай-ақ Мемлекет басшысының тапсырмасы бойынша Құрылтаймен, Үкіметпен және басқа мемлекеттік органдармен, саяси партиялармен, қоғамдық бірлестіктермен және халықаралық ұйымдармен өзара іс-қимыл кезінде Президент атынан өкілдік етеді.

Вице-Президентке қандай міндеттер жүктелді?

Вице-Президент Президенттің тапсырмасы бойынша халықаралық іс-шараларға қатысады. Сонымен қатар Әлемдік және дәстүрлі діндер лидерлері съезінің хатшылығын басқарады және Президент жанындағы Қазақстанның стратегиялық зерттеулер институтының қызметіне жетекшілік етеді.

Ол бірқатар комиссия мен кеңестің жұмысын қамтамасыз етеді. Олардың қатарында Мемлекеттік наградалар жөніндегі, Азаматтық мәселелері жөніндегі, мемлекеттік рәміздер мен наградалар геральдикасы жөніндегі, шетелде кадрлар даярлау жөніндегі республикалық комиссиялар бар.

Сондай-ақ Вице-Президент әл-Фараби атындағы ғылым және техника саласындағы және Абай атындағы әдебиет және өнер саласындағы мемлекеттік сыйлықтарды беру жөніндегі комиссиялардың, Жастар саясаты жөніндегі кеңестің қызметін қамтамасыз етеді.

Мемлекеттік органдарға тапсырма бере алады

Жарлық Вице-Президентке бірқатар құқық береді. Ол өз өкілеттігін жүзеге асыру үшін өкім шығара алады және өз құзыретіне кіретін мәселелер бойынша орталық және жергілікті атқарушы органдарға тапсырма бере алады.

Сондай-ақ Вице-Президент Құрылтайдың, Үкіметтің, Қазақстан Халық Кеңесінің және Президент жанындағы консультативтік-кеңесші органдардың отырыстарына қатысуға құқылы.

Ол мемлекеттік органдар мен лауазымды тұлғалардан қажетті ақпарат пен құжаттарды сұрата алады. Бұдан бөлек, өз құзыретіндегі мәселелер бойынша және Президент қойған міндеттерді орындау үшін Президент актілерінің жобаларын әзірлейтін ведомствоаралық жұмыс топтарын құра алады.

Вице-Президенттің қызметін ұйымдық-құқықтық және ақпараттық-талдамалық жағынан Президент Әкімшілігі қамтамасыз етеді.

Жарлық қол қойылған күнінен бастап күшіне енеді.

Бұған дейін Ерлан Қарин Қазақстанның Вице-Президенті болып тағайындалған. Оның кандидатурасын Құрылтай депутаттарының 141-і қолдап, төртеуі қалыс қалған еді.