Франция мен Италиядағы сценарий қайталануы мүмкін: Германия неден қауіптенеді

Германияның құқық қорғау органдары мен қауіпсіздік қызметтері 31 қазанға жоспарланған жастардың ауқымды қарсылық акцияларына орай дайындық шараларын бастады. Елдің Ішкі істер министрлігі (ІІМ) ықтимал тәуекелдерді бағалап, ведомствоаралық жұмыстарды үйлестіруде. Сондай-ақ Франция және Италия билігімен де өзара іс-қимыл орнатылған, деп хабарлайды Dw.com

Конституцияны қорғау федералдық ведомствосы зорлық-зомбылық әрекеттеріне шақырулардың таралуын болдырмау мақсатында әлеуметтік желілердегі профильдік сайттар мен арналарға мониторинг жүргізуде. Қажет болған жағдайда аймақтық полиция қызметтеріне Федералдық полиция тарапынан қосымша қолдау көрсетіледі. ІІМ өкілдерінің хабарлауынша, наразылық акцияларына зорлық-зомбылық жасау мақсатында келмекші шетелдік азаматтардың елге кіруіне шекарада шектеу қойылуы мүмкін.

Ведомство өкілдері бейбіт демонстрациялар мен радикалды топтардың әрекеттерін ажырату қажеттігін атап өтті. Атап айтқанда, бір тарапта мектеп оқушыларының бейбіт акциялары тұрса, екінші тарапта осы шараларды зорлық-зомбылық тарату үшін пайдалануы мүмкін радикалды орта бар.

Наразылық білдіруге шақыруларды «GenZ regelt» («Z ұрпағы шешеді») бастамасы таратуда. Қозғалыстың ресми сайтында қатысушылардың білім беру мен денсаулық сақтау жүйесін жақсартуды, климатты қорғау шараларын күшейтуді, өмір сүру құнын арзандатуды талап ететіні, сондай-ақ міндетті әскери қызметті қайта енгізуге және жастар есебінен бюджетті үнемдеу саясатына қарсы екені көрсетілген. Акциялар 31 қазанда Германияның 21 қаласында, соның ішінде Берлин, Гамбург, Мюнхен, Кельн, Франкфурт-на-Майне, Дюссельдорф, Лейпциг және Дрезденде бір уақытта өтеді деп жоспарлануда. Қозғалыс сайтындағы есептегіш мәліметіне сәйкес, 40 мыңнан астам адам қатысуға ниет білдірген. Ұйымдастырушылар шерулердің бейбіт түрде өтетінін хабарлады.

Халықаралық тәжірибе және ұйымдардың ұстанымы

Германия мектеп оқушыларының федералдық конференциясы жоспарланған акцияларға оң баға берді. Ұйым өкілі Изабель Зельтенрайх (Isabelle Seltenreich) оқушылардың білім беру жүйесін жақсартуды талап етуге құқылы екенін мәлімдеді. Оның айтуынша, оқушылар бұған дейін Франция мен Италиядағы протесттерде айтылған талаптарды, соның ішінде мектептердің материалдық базасын жақсартуды, мұғалімдер санын көбейтуді және сыныптардағы оқушылар санын азайтуды қолдайды. Сонымен бірге Зельтенрайх наразылық қозғалысының саяси манипуляциялардың нысанына айналуы мүмкін екенін ескертті.

Еске салсақ, қыркүйек айының соңынан бері Францияда, кейіннен Италияда мектеп оқушыларының жаппай қарсылық акциялары өтіп жатыр. Екі елде де кейбір демонстрациялар тәртіпсіздіктерге ұласқан болатын. Германия Полиция кәсіподағының (GdP) басшысы Йохен Копельке (Jochen Kopelke) неміс құқық қорғау органдарының ықтимал тәртіпсіздіктерге дайындығы жоғары екенін жеткізді. Ол полицияның профилактика мен коммуникацияға басымдық беретінін, сонымен бірге бейбіт акцияларға кедергі жасамай, гиперараласу арқылы бұзақылықтың алдын алуға қабілетті екенін атап өтті.