Тоқаев: Кейбір әлеуметтік жеңілдіктер жымқыру негізінде беріліп жатыр

Президент Қасым-Жомарт Тоқаев Қазақстанда кейбір әлеуметтік жеңілдіктердің берілу тәртібіне қатысты мәселе көтерді. Мемлекет басшысы бұл туралы Республика күніне арналған салтанатты жиында айтты.

«Елімізде неше түрлі әлеуметтік жеңілдіктер бар, тіпті, олардың кейбірі жымқыру негізінде беріліп жатыр. Сондықтан қазір Үкімет бұл мәселені жан-жақты зерттеп, осы жұмыспен айналысуда», – деді Президент.

Тоқаевтың айтуынша, кейінгі жеті жылда Қазақстанда әлеуметтік саланы дамытуға 88 трлн теңге бөлінген. Президент бұл қаражатты халықтың әл-ауқатын жақсартуға салынған инвестиция деп бағалады.

Президенттің бұл мәлімдемесі әлеуметтік қолдау жүйесін қайта қарау жүріп жатқан тұста айтылды. 2027 жылдан бастап Қазақстанда бірқатар әлеуметтік төлемді тағайындағанда отбасының тұрмыс деңгейі ескеріледі. Ол үшін Цифрлық отбасы картасындағы әл-ауқат деңгейі пайдаланылады.