Рим Папасы Украина Ресеймен соғысты аяқтауы қажет деген сөзі үшін наразылыққа тап болды

Рим Папасы Францисктің “Украина “ақ туды көтеруге батылдық танытып”, Ресеймен соғысты тоқтату үшін келіссөздер жүргізуі керек” деген сөзіне Украина үкіметі қатулы жауап қатып, ешқашан берілмейтіндеріне уәде берді, деп хабарлайды Qrnews.kz тілшісі The Guardian-ға сілтеме жасап.

"Біздің туымыз - сары және көк. Біз осы тудың астында өмір сүреміз, өлеміз және өркендейміз. Біз ешқашан басқа туды көтермейміз", - деп жазды әлеуметтік желіде Украина сыртқы істер министрі Дмитрий Кулеба.

Украина президенті Владимир Зеленский понтификтің «виртуалды делдалдықпен» айналысатынын айтты. Зеленский Францискке немесе оның сөздеріне тікелей сілтеме жасамады, бірақ Украинада көмектесіп жатқан діни қайраткерлерді атап өтті. 

"Олар бізді дұғамен және істерімен қолдайды. Бұл шынымен де шіркеу халықпен бірге екенін көрсетеді. 2500км жерден өмір сүргісі келетіндер мен оларды жойғысы келетіндердің арасында виртуалды делдал болу емес", - деді Зеленский өзінің кешкі бейнеүндеуінде. 

Еуропадағы саясаткерлер мен комментаторлар понтифик берген сұхбатында Ресейдің басқыншы агрессор ретіндегі қылмыстары туралы үнсіз қалып, бейбітшілік орнатуға деген бүкіл жауапкершілікті Украинаға жүктей салғаны үшін наразы екенін білдірді.

Кулеба Францискті «жақсылық жағында болуға» және Ресей мен Украинаны «бір деңгейге қойып, оны «келіссөздер» деп атамауға» шақырды.

Христиан-демократиялық одағының неміс еуропалық депутаты Деннис Радтке понтификтің түсініктемелерін сипаттау үшін «масқара» сөзін қолдануға болатынын айтты.

"Оның Украинаға қатысты ұстанымы оның понтификатына нашар әсер етеді. Бұл ақылға қонымсыз", - деп жазды ол.

«Рим папасының Украинаны қорғауға шақырмайтыны, Ресейді ондаған мың адамның өмірін қиған агрессор ретінде айыптамайтыны таңқаларлық. Путинді соғысты тоқтатуға шақырмайды, бірақ Украинаны оның орнына ақ туды көтеруге шақырады. Оның барлық кардиналдары осы ұстанымды бөлісе ме?» - деп жазды Х-те блогер, Украина ішкі істер министрлігінің бұрынғы кеңесшісі Антон Геращенко.

"Тепе-теңдік үшін Путинді өз әскерін Украинадан шығаруға батылдық танытуға шақыру туралы не деуге болады? Бейбітшілік келіссөз жүргізбей-ақ бірден орнайтын еді”, - деп жазды Польшаның сыртқы істер министрі Радослав Сикорский.

Сенбіде швейцариялық телеарналар таратқан, бірақ Ватиканның айтуынша, ақпан айында берген сұхбатында, Рим папасы Украина соғысындағы тараптарды «келіссөздер жүргізуге батыл болуға» және оны «жағдай нашарламай тұрып» істеуге шақырды.

“Мен жағдайды көріп, адамдарды ойлап, ақ туды көтеріп, келіссөз жүргізуге батылы жететіндер ең күшті адамдар екеніне сенемін. “Келіссөздер” сөзі - батыл сөз. Сіз жеңілгеніңізді, жағдайдың жақсармай жатқанын көргенде келіссөзге бару - батылдық”, - деді 87 жастағы Папа.

Францисктің айтуынша, украиналықтар жағдай одан әрі ушығып кетпей тұрып, бейбіт келісімге келуден қорықпау керек. 

"Бүгінгі таңда, мысалы, Украинадағы соғыс жағдайында делдал болғысы келетіндер көп. Мысалы, Түркия. Жағдай ушығып кетпей тұрып, келіссөздер жүргізуге ұялмаңыздар” - деді ол.

Ватиканның коммуникациялар жөніндегі директоры Маттео Бруни понтификтің сөздерін түсіндіруге бағытталған мәлімдеме жасады. Оның айтуынша, Франциск «ақ ту» терминін соғыс қимылдарын тоқтату, батыл келіссөздер арқылы қол жеткізілген бітімге сілтеме жасау үшін қолданған.