Парижде отау құруға бел буған қазақ жастарын Франция президенті құттықтады

Парижде қалыңдығына ұсыныс жасаған қазақстандық Санжар Тайжан мен оның жарын Франция президенті Эммануэль Макрон құттықтады.

"Сүйіктіме ұсыныс жасадым. Франция президенті - Э. Макрон бірнеше сағаттан кейін бізді құттықтады", - деп жазды жігіт әлеуметтік желіде.

Екі жасты құттықтаған Франция президенті олардың елін сұрайды. "Қазақстан, Президент Тоқаев" деп жауап берген Санжарға қазақ елін білетінін, Қазақстанда болғанын айтады. Макрон Тоқаевтың сыйлаған тазы күшіктерін де есіне алады.

Атап өтейік, былтыр қараша айында Қазақстан президентінің шақыруымен Астанаға Франция президенті келіп "Этноауыл" көрмесін аралап көріп, қазақ халқының бай мәдени мұрасымен танысқан еді. Көрме орталығын тамашалау барысында Эммануэль Макронға қазақы тазының тұқымы ерекше ұнаған болатын. Сол кезде Қасым-Жомарт Тоқаев франциялық әріптесіне тазы сыйлауға уәде берген еді.