Шетелдіктерге жаңа талап, бизнеске шектеу: қарашада Қазақстанда не өзгереді

Қазақстанда 1 қарашадан бастап шетелдіктердің елге кіруі мен салық берешегі бар компанияларға қатысты бірқатар жаңа талап енгізіле бастады. Қарашада салық есептілігін тапсыру мен міндетті төлемдерді өтеудің бірнеше мерзімі де аяқталады.

Шетелдіктерге QazETA енгізіле бастады

1 қарашадан бастап Қазақстанға визасыз келетін шетел азаматтарына арналған QazETA электронды рұқсат жүйесі кезең-кезеңімен іске қосылды.

Алғашқы кезеңде жүйе Ақтау халықаралық әуежайында, Павлодар облысындағы «Үрлітөбе», Жамбыл облысындағы «Аухатты», Түркістан облысындағы «Атамекен» және Жетісу облысындағы «Нұрлы жол» автомобиль өткізу бекеттерінде қолданылады.

Шетел азаматы электронды рұқсатқа Қазақстанға келерден кемінде 72 сағат бұрын өтініш бере алады. Рұқсат тегін рәсімделеді және 180 күнге жарамды.

Алайда QazETA әзірге міндетті емес. 2027 жылғы 30 маусымға дейін өтпелі кезең белгіленген және электронды рұқсаттың болмауы шетел азаматын елге кіргізбеуге негіз болмайды. 2027 жылғы 1 шілдеден бастап тиісті санаттағы шетел азаматтары үшін QazETA міндетті болады.

Салық берешегі бар компанияларға шектеу қойылады

1 қарашадан бастап салық және басқа да міндетті төлемдер бойынша берешегі 45 АЕК-тен, яғни 194 625 теңгеден асқан және қарызын төрт ай бойы өтемеген компаниялар басшысын немесе заңды мекенжайын өзгерте алмайды.

Шектеу кедендік төлемдер, баж, пайыз және өсімпұл бойынша берешегі бар заңды тұлғаларға да қолданылады.

Қарашадағы салық мерзімдері

Қарашада азаматтар мен кәсіпкерлер үшін бірнеше салық мерзімі бар. Жеке практикамен айналысатындар 5 қарашаға дейін қазан айындағы табысынан жеке табыс салығын төлеуі керек.

Бірқатар салық декларациясын тапсыру мерзімі 16 қарашада аяқталады. Міндетті салық төлемдерінің бір бөлігі 20 және 25 қарашаға дейін төленуге тиіс.