ОТАНДЫҚ ӨНДІРУШІЛЕРДІҢ ӨНІМІ САУДА СӨРЕЛЕРІНЕ КЕДЕРГІСІЗ ЖЕТУІ КЕРЕК – ДЕПУТАТ

Депутат, «Әділет» партиясы фракциясының мүшесі Нұржан Ниязалиев Президенттің «Жаңа тарихи кезеңдегі Қазақстанның өзекті міндеттері» атты Жолдауында көтерілген мәселелерге қатысты пікір білдірді.

Оның айтуынша, отандық өндірушілердің сауда желілерімен жұмыс істеуінде бірқатар кедергі бар. Ең алдымен, тауарды сөреге орналастыру шарттары, қосымша төлемдер мен есеп айырысу мерзімдері келісімшартта нақты көрсетіліп, екі тарапқа да түсінікті болуы керек. Бұл кәсіпкерлерге шығындарын алдын ала есептеп, өндіріс жұмысын жоспарлауға мүмкіндік береді.

Сондай-ақ сауда желілері өнімді қабылдау талаптарын ашық жариялауы қажет. Егер тауарды қабылдаудан бас тартылса, оның себебі өндірушіге жазбаша түрде түсіндірілуі тиіс. Осылайша, сапаға, жеткізу көлеміне немесе келісім талаптарына қатысты келіспеушіліктердің алдын алуға болады.

Нұржан Ниязалиев өткізілген тауар үшін төлемнің кешіктірілуі де шағын өндірушілерге қиындық туғызатынын атап өтті. Себебі кәсіпкерлерге шикізат сатып алу, өндірісті тоқтатпау және жаңа тапсырыстарды орындау үшін тұрақты қаржы айналымы қажет.

Осыған байланысты депутат келісімшартта белгіленген төлем мерзімдерінің сақталуын бақылауды күшейтіп, тараптар арасында дау туындаған жағдайда шағымдарды жедел қарайтын жүйе қалыптастыруды ұсынды.

Сонымен қатар кәсіпкерлер өз құқықтарын қорғағаны үшін сауда серіктестігінен айырылып қалудан қорықпауы керек. Сондықтан отандық өндірушілердің мүддесін қорғайтын ашық, қолжетімді әрі тиімді тетіктер қажет.