Қайрат Сатыбалдыға тиесілі болған «Байсат» базарының жаңа иесі белгілі болды

Алматыдағы «Байсат» көтерме-бөлшек сауда орталығының жаңа иесі белгілі болды. Ашық деректерге сәйкес, базар активтеріне иелік ететін компанияның жаңа құрылтайшысы – ERG-дің Қазақстандағы құрылымын басқаратын Кудрәт Шамиев бақылауындағы Central Trade Management Ltd. компаниясы.

Кудрәт Шамиев биыл маусымда Eurasian Resources Group-тың Қазақстандағы құрылымына басшылық етіп, «Еуразиялық Топ» ЖШС бас директоры қызметіне тағайындалған. Ол сондай-ақ Todini Costruzioni Generali SpA директорлар кеңесінің құрамына кіреді және Integra Construction KZ бен Kazakh Construction Group компанияларының байқаушы кеңестерін басқарады.

«Байсат» базары бірнеше сәтсіз әрекеттен кейін 7 тамызда электронды сауда арқылы сатылған. Сатып алушы нысанды 24,7 млрд теңгеге алған.

Базар құрамына жалпы аумағы 4221,4 шаршы метр болатын үш нысан және 1,4 гектар жер телімі кіреді.

Бұған дейін бұл активтер Қайрат Сатыбалдының ұлы Бауыржан Нұрсұлтанға тиесілі «ҚазГерСтрой» бірлескен кәсіпорны» ЖШС мен «Astana Finansial Group» ЖШС-ге байланысты болған. Оның үлесі 2024 жылғы қаңтарда мемлекетке қайтарылған.

Қайрат Сатыбалдыға қатысты сотқа дейінгі тергеу аясында базардың басым бөлігі мемлекетке ерікті түрде берілген. 2024 жылғы қазанда нысан Қайтарылған активтерді басқару компаниясының теңгеріміне өткен.

«Байсат» базарын 2025 жылдың қарашасы мен желтоқсанында сатуға әрекет жасалғанымен, өтінім болмағандықтан сауда өтпей қалған. Кейін тағы бір сауда биыл ақпанға жоспарланған.