Данияда әйелдерді әскери қызметке шақырады

Дания үкіметі әскерге шақыру жүйесін түбегейлі қайта құрылымдауды жоспарлап отыр. Жаңашылдықтардың бірі - әйелдер мен ерлердің толығымен тең жағдайда әскер қатарына шақырылуы. Бұл туралы  қорғаныс министрі Троэлс Лунд Поулсен мәлімдеді, деп хабарлайды Qrnews.kz тілшісі ТАСС агенттігіне сілтеме жасап.

«Бұл жынысына қарамастан барлық жастар әскери қызметке шақырылады деген сөз», - деп түсіндірді ол. 

Өзгерістер 2026 жылы күшіне енеді. Қазіргі уақытта әскери қызметке бару не бармау әйелдің өз еркінде. Сондай-ақ олар өз қалауы бойынша әскери қызметін тоқтата алады.

Сонымен қатар үкімет әскери қызмет мерзімін 4 айдан 11 айға дейін ұзартпақ. 

«Ұзақ қызмет мерзімі әскерге шақырылғандардың біліктілігін шыңдай түседі», - деп жалғастырды министр. 

Бұл ретте ол алдағы уақытта да әйелдер әскери қызметтен бас тарта алатынын атап өтті.

Үкімет әскерге шақырылғандар санын 4,7-ден 5 мыңға дейін ұлғайтуды көздеп отыр.Алғашқы бес айда олар бастапқы дайындықтан өтіп, одан кейін жедел қызметке түсіп, қосымша дағдыларды меңгереді деп жоспарлануда.