Әзербайжанда Құрманғазы атындағы балалар орталығы ашылды

Әзербайжанның Физули қаласында Құрманғазы атындағы Балалар шығармашылығы орталығы ашылды. Орталықтың ашылуына Қазақстан президенті Қасым-Жомарт Тоқаев пен Әзербайжан президенті Ильхам Әлиев қатысты. Бұл жөнінде Ақорда баспасөз қызметі хабарлады.

Қасым-Жомарт Тоқаев бұл орталықты "қазақстандықтар атынан бауырлас әзербайжан халқына гуманитарлық тарту" деп атады. Орталықты қазақстандық BI Group компаниясы салған.

"Бұл тек балалар шығармашылығын шыңдап қана қоймай, Қазақстан мен Әзербайжанның достығы мен бауырластығын айшықтайтын орталық болады" деді Әзербайжан президенті.

Балалар орталығының жобасы 2022 жылғы 24 тамызда Тоқаевтың Әзербайжанға алғашқы жұмыс сапары кезінде таныстырылған. Ресми ақпарат бойынша, ғимарат 9 айдың ішінде салынған. Екі қабатты ғимаратта 600 бала мектептен тыс білім ала алады. Онда өнер, спорт және басқа да салалар бойынша үйірмелер болмақ.