Ауаны ластау - енді қымбат: Астанадағы ФАО жиынында қандай құпия ашылды?

Бүгін елордадағы «KAZENERGY» конференция залында Қазақстан экономикасының болашағына тікелей әсер ететін маңызды жиын өтті. Біріккен Ұлттар Ұйымының Азық-түлік және ауыл шаруашылығы ұйымы (ФАО) ұйымдастырған семинар-тренинг қазақстандық бизнесті декарбонизациялау және климаттық қаржыландыруды тарту мәселелеріне арналды.

Әлемдік нарықта «жасыл» стандарттар қатаңдап жатқан тұста, отандық компаниялар үшін декарбонизация - тек сән емес, өміршеңдік мәселесі. Семинардың басты мақсаты - бизнес өкілдеріне Париж келісімінің 6-бабы аясында халықаралық көміртек нарықтарына шығу жолдарын үйрету. Бұл тетік кәсіпорындарға өз шығарындыларын азайту арқылы халықаралық қорлардан қомақты қаржы тартуға мүмкіндік береді.

Жиынға Қазақстан Республикасы Экология және табиғи ресурстар министрлігі, «Атамекен» ҰКП, Парламент депутаттары мен жетекші халықаралық сарапшылар қатысты. Спикерлер қазіргі таңда экологиялық тазалықтың тікелей табысқа айналатын кезеңі туғанын ашық айтты.

ҚР Экология және табиғи ресурстар министрлігі климаттық саясат департаментінің директоры Сәуле Сәбиева елдегі институционалдық дайындыққа тоқталды:

«Қазақстан үшін көміртек нарықтарын реттеудің ұлттық жүйесін қалыптастыру - стратегиялық басымдық. Біз отандық компаниялардың экологиялық тұтастықты сақтай отырып, сапалы климаттық қаржы тартуына барлық жағдайды жасаймыз», - деді ол.

Ал Президент жанындағы Жасыл экономика жөніндегі кеңестің мүшесі Бахыт Есекина төмен көміртекті модельге көшу - экономиканың ұзақ мерзімді бәсекеге қабілеттілігінің кепілі екенін атап өтті. Франциядан келген сарапшы Георгий Сафонов Қазақстанның энергетика мен орман шаруашылығындағы зор әлеуетін айта келе, халықаралық мониторинг пен верификация стандарттарын қатаң сақтау керектігін ескертті. Оның айтуынша, сапасыз жобалар халықаралық нарыққа жіберілмейді.

ФАО үйлестірушісі Жаңыл Бозаева аграрлық сектордың рөліне ерекше тоқталды. Оның айтуынша, жайылымдарды дұрыс басқару және жер ресурстарын тиімді пайдалану парниктік газдарды жұтудың қуатты құралына айнала алады. Бұл бағыттағы климаттық жобалар тек экологиялық емес, сонымен қатар ауыл тұрғындары үшін жаңа жұмыс орындары мен әлеуметтік-экономикалық пайда әкелмек.

Семинар қатысушылары климаттық жобаларды әзірлеудің нақты құралдарын, соның ішінде PIN және PDD құжаттамасын дайындауды меңгерді. Энергетика мен орман шаруашылығындағы нақты кейстер талқыланып, «жасыл» инвестиция тартудың қадамдық алгоритмі көрсетілді.

Астанадағы бұл шара Қазақстанның жаһандық климаттық күн тәртібіне толыққанды енуіне және ұлттық бизнестің технологиялық жаңғыруына серпін бермек.