Тоқаев Бейбітшілік кеңесінің өкілімен Газа секторына қатысты Қазақстанның бастамаларын талқылады

Президент Қасым-Жомарт Тоқаев Бейбітшілік кеңесінің аға кеңесшісі Арье Лайтстоунды қабылдады. Кездесу барысында тараптар Газа секторындағы жағдайды жақсартуға бағытталған бастамаларды талқылады. Атап айтқанда, әлеуметтік нысандарды қалпына келтіру, білім беру мен денсаулық сақтау салаларын қолдау, сондай-ақ өңірдегі азық-түлік қауіпсіздігін қамтамасыз ету мәселелері сөз болды.

Мемлекет басшысы Қазақстанның Бейбітшілік кеңесіне қатысуына ерекше мән беретінін айтып, ұйыммен тиімді ынтымақтастықты жалғастыруға дайын екенін жеткізді.

«Біз Бейбітшілік кеңесінің негізін қалаушылардың бірі ретінде бұл институттың жаһандық қауіпсіздік пен халықаралық диалогты нығайтуға ықпал ететініне сенеміз», – деді Президент.

Кездесу барысында тараптар өңірлік тұрақтылықты қамтамасыз ету және гуманитарлық бастамаларды ілгерілету бағытындағы өзара іс-қимыл мәселелерін де қарастырды.

Сонымен қатар, Арье Лайтстоун Мемлекет басшысына АҚШ Президенті Дональд Трамптың ыстық ықыласы мен сәлемін жеткізді. Ол Қазақстанның халықаралық ұйымдардағы белсенді рөлін жоғары бағалап, елдің Ибраһим келісімдеріне қосылу туралы шешімін атап өтті. Кездесу барысында көлік-логистика саласындағы ынтымақтастық, TRIPP бастамасы мен Орта дәлізді дамыту перспективалары да талқыланды. Тараптар өңіраралық байланысты күшейту және халықаралық көлік бағыттарын әртараптандыру мәселелеріне назар аударды. Кездесу қорытындысында Қазақстан мен Бейбітшілік кеңесі екіжақты және көпжақты ынтымақтастықты одан әрі тереңдетуге дайын екенін растады.