«Астанада» үлкен өзгеріс күтілуде: клуб трансферлерді кейінге қалдырды

«Астана» баскетбол клубының басшылығы маусым қорытындысына арналған баспасөз мәслихатында команданың нәтижелері мен алдағы жоспарлары туралы айтты. Клуб өкілдерінің сөзінше, маусым барысында болған өзгерістер шешуші ойындарға әсер еткен.

Клубтың бас директоры Самсон Аракелян маусым басында көпшілік команданың мүмкіндігін төмен бағалағанын айтты. Соған қарамастан елордалық клуб Батыс Азия суперлигасында сәтті өнер көрсетіп, тұрақты чемпионатты бірінші орынмен аяқтады. Сонымен қатар өз алаңында бірде-бір кездесуінде жеңілген жоқ.

Оның айтуынша, бұл жетістіктерде бұрынғы бас бапкер Рамунас Цвирканың еңбегі зор. Ал Қазақстан чемпионатының финалы елдегі баскетболға деген қызығушылықтың артқанын көрсетті. Ақтау мен Астанадағы матчтарға жанкүйерлердің көп жиналуы және трансляция көрсеткіштерінің өсуі осының дәлелі болды.

Легионерлерсіз өткен ойындағы жеңіс жайлы:

Рүстем Мырзағалиев, «Астана» капитаны:

Адас Юшкявичустың ойыннан кетуі біз үшін күтпеген жағдай болды. Ол шабуылдағы негізгі ойыншылардың бірі еді. Бірақ сол сәтте команда болып бірігіп, жауапкершілікті өз мойнымызға алдық. Әсіресе қазақстандық ойыншылар мінез көрсетіп, жеңіс үшін соңына дейін күресті. Бұл жеңіс бізге үлкен сенімділік берді.

Мағжан Сәрсенғалиев, «Астана» ойыншысы:

Бұл жеңістің біз үшін маңызы ерекше болды. Себебі көпшілік арасында «Астана» легионерлерсіз ойнай алмайды деген пікір қалыптасқан еді. Біз сол көзқарасты өзгерткіміз келді. Сондықтан төртінші матч біз үшін қосымша мотивация болды. Команда болып бір мақсатқа жұмылып, өз мүмкіндігімізді дәлелдеуге тырыстық. Нәтижесінде маңызды жеңіске қол жеткізіп, қазақстандық ойыншылардың да жоғары деңгейде өнер көрсете алатынын көрсеттік.

Жаңа маусым алдындағы трансферлік жұмыстар басталды ма? Кеше ғана «Атырау Барыстарынан» кеткен Майкл Майсқа қызығушылық бар ма?

Самсон Аракелян, клубтың бас директоры:

Майкл Майс – жоғары деңгейдегі ойыншы, жақсы мерген. Бұған дейін біз оны WASL турниріне қатысуы мүмкін кандидаттардың бірі ретінде қарастырғанбыз. Алайда қазіргі уақытта құрамды жасақтау мәселесі кейінге қалдырылды. Себебі клубта жаңа бас бапкер әлі тағайындалған жоқ.

Бас директордың айтуынша, алдағы трансферлер мен ойыншыларға қатысты шешімдер жаңа жаттықтырушы мен спорттық директордың келісімі негізінде қабылданады. Сондықтан клуб алдымен бас бапкер мәселесін шешіп, содан кейін ғана келесі маусымның құрамын жасақтауға кіріспек.

Айта кетейік, «Астана» Қазақстан чемпионатының финалында «Каспийге» қарсы серияда 2:3 есебімен жеңіліп, күміс жүлдегер атанды. Ал елордалық клуб FIBA WASL турнирінің финалдық кезеңіне жолдама алып, халықаралық аренадағы өнерін келесі маусымда жалғастырады.

Мұратбекқызы Нуризат