Мемлекеттік рәміздер күні Түркістанда 500-ден астам әлеуметтік осал топ өкілдеріне пәтер кілттері берілді

Қазақстан Республикасының Мемлекеттік рәміздер күні аясында Түркістан қаласындағы «Жібек жолы» тұрғын үй кешенінен 512 отбасыға жаңа пәтерлердің кілті салтанатты түрде табыс етілді. Осылайша, өңірдегі 3 мыңнан астам тұрғын заманауи әрі жайлы баспанамен қамтамасыз етілді. Жаңа қоныстанушылардың қатарында көпбалалы аналар мен халықтың әлеуметтік осал топтарына жататын азаматтар бар.

Салтанатты шараға Түркістан облысының әкімі Нұралхан Көшеров арнайы қатысып, тұрғындарды айтулы мерекемен және қоныс тойымен құттықтады.

«Баршаңызды бүгінгі жүректі тебірентер қуанышты сәтпен шын жүректен құттықтаймын! Бұл - жүздеген отбасының көптен күткен арманы орындалған ерекше мереке. Мемлекет басшысы Қасым-Жомарт Кемелұлы Тоқаев халықтың әл-ауқатын арттыру мен тұрғындарды баспанамен қамтамасыз етуді үнемі басты міндет ретінде белгілейді. Осы міндеттерді жүйелі жүзеге асырудың нәтижесінде өңірімізде тұрғын үй құрылысы қарқынды дамып, мыңдаған азаматтың тұрғын үй мәселесі шешімін табуда», - деді аймақ басшысы.

Өз сөзінде облыс әкімі өңірдегі тұрғын үй құрылысының серпініне тоқталып өтті. Мәселен, өткен жылы облыс көлемінде кезекте тұрған 3 564 азаматқа пәтер кілті табысталса, ағымдағы жылы тағы 2 292 пәтер беру жоспарланған. Сонымен қатар, Нұралхан Оралбайұлы тұрғындарды аула тазалығын сақтауға және Мемлекет басшысының бастамасымен өтіп жатқан «Таза Қазақстан» бағдарламасына белсенді атсалысуға шақырды.

Айта кету керек, бұл шараның құқықтық тұрғыдан маңызы зор. Тұрғын үй заңнамасына енгізілген соңғы өзгерістерге сәйкес, мұқтаж азаматтарды есепке алу, кезектілікті жүргізу және баспана бөлу функциялары «Отбасы банк» АҚ-на берілген болатын. Бүгін пәтер алған түркістандықтар - аталған жаңа ереже бойынша іріктеуден өтіп, жолдама алған алғашқы азаматтар.