Шығыс Қазақстан облысының әкімі дарынды оқушыларды марапаттап, лагерьге жолдама берді

Шығыс Қазақстан облысының әкімі Нұрымбет Сақтағанов 1 маусым – Халықаралық балаларды қорғау күніне орай өңірдің ең белсенді әрі дарынды оқушыларымен арнайы кездесу өткізді. Аймақ басшысы облыс намысын республикалық және халықаралық деңгейдегі ғылыми олимпиадаларда, шығармашылық байқаулар мен спорттық жарыстарда абыроймен қорғап жүрген жас буынды мерекемен құттықтады.

Балалар мерекесінің құрметіне облыс әкімі дарынды жеткіншектерге ақшалай сертификаттар мен «Дарын» жазғы сауықтыру лагеріне арнайы жолдамаларды салтанатты түрде табыс етті.

«Мемлекет басшысы Қасым-Жомарт Тоқаев балалар мен жастарды қолдауды мемлекеттік саясаттың маңызды басымдықтарының бірі ретінде қарастырады. Сондықтан біздің ортақ мақсатымыз – әрбір балаға жан-жақты дамуға, сапалы білім алуға және өмірден өз орнын табуға мүмкіндік жасау», – деп атап өтті ШҚО әкімі Нұрымбет Сақтағанов.

Ресми бөлімнен кейін қонақтар үшін арнайы мерекелік гала-концерт ұйымдастырылды. Сахна төрінде облыстың түкпір-түкпірінен келген талантты би ұжымдары мен вокалдық ансамбльдер өнер көрсетіп, оларға да ақшалай сертификаттар берілді. Облыс әкімі кездесу барысында өңір оқушыларының биыл бағындырған биіктерін ерекше мақтанышпен тілге тиек етті.

Айта кетейік, биыл жас шығысқазақстандықтар республикалық және халықаралық олимпиадалар мен байқауларда олжалы болып, қоржынға 171 медаль салды. Оның ішінде 37 алтын, 46 күміс және 88 қола медаль бар. Өңір басшысы бұл көрсеткіш облыстағы білім беру сапасының жоғары деңгейін және жастардың зор әлеуетін тағы бір мәрте дәлелдейтінін жеткізді.