АҚШ-тың араласуынсыз: Еуропа Ресейді келіссөз үстеліне отырғызудың жоспарын әзірлеп жатыр

Германия, Франция және Ұлыбритания Ресей мен Украина арасындағы келіссөздерді қайта жандандыру мүмкіндігін қарастырып жатыр. Bloomberg агенттігінің хабарлауынша, бұл бағыттағы ұсыныстар Киевпен бірлесіп талқылануда.

Дереккөздердің мәліметінше, Еуропа елдері қақтығыстың созылып кетуіне және соғыстың тағы бір қыс мезгіліне ұласуына алаңдаулы. Осыған байланысты Берлин, Париж және Лондон дипломатиялық күш-жігерін күшейтіп, бейбіт реттеу процесіне белсендірек қатысуды көздеп отыр.

Агенттік мәліметіне қарағанда, бұл бастамалар АҚШ-тың қатысуымен өткен келіссөздерде айтарлықтай нәтиже болмағаннан кейін көтерілген.

Сонымен бірге Еуропа елдері Украинаға қысым көрсетуді жоспарламайды. Ресеймен келіссөздерді бастау немесе бастамау жөніндегі түпкілікті шешім Киевтің өз құзырында қала береді.

Bloomberg мәліметінше, жақын күндері Ұлыбритания премьер-министрі Кир Стармер бұл мәселені Германия канцлері Фридрих Мерц және Франция президенті Эмманюэль Макронмен талқылауы мүмкін.

Бұған дейін Ресей тарапы бейбіт келіссөздерге ашық екенін бірнеше рет мәлімдеген. Ал Украина президенті Владимир Зеленский Мәскеумен тікелей диалог жүргізуге дайын екенін айтқан болатын.