Азияның жетекші университеттері Астанада бас қосты

Астанада Азияның жетекші жоғары оқу орындарының басшылары бас қосқан Asian Universities Alliance (AUA) Presidents Forum 2026 форумы өтті. Шарада жоғары білімнің болашағы, жасанды интеллект, университеттерді басқару және индустриямен әріптестік мәселелері талқыланды.

Форумға Азия және басқа өңірлердің танымал университеттерінің президенттері мен аға басшылары қатысты. Олардың қатарында Tsinghua University, The University of Tokyo, Seoul National University, Nazarbayev University және басқа да жетекші оқу орындары бар.

Форумның ашылуында Ғылым және жоғары білім министрі Саясат Нұрбек Қазақстан жоғары білім жүйесін жаңғыртуға басымдық беріп отырғанын айтты. Оның сөзінше, болашақ университеттері жасанды интеллектіні тек оқыту құралы ретінде емес, өз қызметінің негізі ретінде қолдануы қажет.

Шара барысында университеттердің өзгермелі әлем жағдайында қалай бәсекеге қабілетті әрі икемді болып қала алатыны талқыланды. Сарапшылар цифрлық трансформация, жаңа басқару модельдері, қаржылық тұрақтылық және еңбек нарығына бейімделген білім беру мәселелеріне тоқталды.

Іс-шараның Астанада өтуі кездейсоқ емес. Бастапқыда Біріккен Араб Әмірліктерінде жоспарланған саммит өңірдегі тұрақсыздыққа байланысты Қазақстанға ауыстырылған.

Кездесу қорытындысында альянс мүшелері ынтымақтастықты кеңейтуге бағытталған бірқатар ұсыныстарды талқылап, ұйым төрағалығы United Arab Emirates University-ден Chulalongkorn University-ге өтті.