Әскерге шақыру науқаны қалай жүріп жатыр: Қорғаныс министрілігінің есебі

Қорғаныс министрлігі 1 маусымдағы жағдай бойынша Қазақстанның Қарулы күштерін, сондай-ақ ҰҚК Шекара қызметін, Мемлекеттік күзет қызметі мен Төтенше жағдайлар министрлігінің бөлімдерін жасақтау жоспары толық орындалғанын хабарлады.

Ведомство мәліметінше, әскер қатарына шақырылған жастардың басым бөлігі жас жауынгер курсынан өтіп, әскери ант қабылдаған. Қазір олар әскери қызметін атқарып жатыр.

Сонымен қатар өңірлерде әкім орынбасарларының жетекшілігімен қалалық және аудандық шақыру комиссиялары жұмысын жалғастырып жатыр. Негізгі назар Ұлттық ұлан бөлімдерін толықтыруға аударылған. Жоспарға сәйкес, оның қатарына 7 мыңнан астам жас азамат шақырылады.

Қорғаныс министрлігі шақыру қағаздары электронды түрде SMS хабарлама және eGov порталы арқылы кемінде үш күн бұрын жіберілетінін еске салды. Электронды хабарлама ресми шақыру қағазымен тең саналады. Дәлелді себепсіз келмегендер әкімшілік жауапкершілікке тартылады, ал әскери қызметтен әдейі жалтарғандарға қылмыстық жауапкершілік қарастырылған.